Իրանական Mehr News լրատվական գործակալությունը, վկայակոչելով ԱԳՆ-ում ունեցած իր աղբյուրը, հայտնում է, որ Իրանի արտգործնախարար Ալի Աքբար Սալեհիի այցը Նիդեռլանդներ չեղյալ է հայտարարվել։
Աղբյուրի հաղորդմամբ՝ դրա պատճառն այն է, որ Հունգարիան Սալեհիի ինքնաթիռին արգելել է մուտք գործել երկրի օդային տարածք։ Աղբյուրը նշել է, որ իրանական իշխանությունները պարզաբանում են պահանջել Թեհրանում Հունգարիայի դեսպանից այդ անհասկանալի արարքի համար։
Նշվում է, որ Սալեհին Նիդեռլանդներ էր այցելում՝ Հաագայում կայանալիք Քիմիական զենքն արգելող կազմակերպության նիստին մասնակցելու համար։
Հիշեցնենք, որ ներկայումս ԱՄՆ-ը Իրանին կասկածում է լիբիական նախկին առաջնորդ Մուամար Քադաֆիին քիմիական զենք տրամադրելու մեջ։