Ֆրանսիայում հանգստյան օրերին կրքերը բորբոքվեցին բռնաբարության հայտնի գործի հետ կապված, որի պատճառով ԱՄՀ տնօրեն Դոմինիկ Սթրոս Կանը զրկվեց պաշտոնից և նախագահական ընտրություններում Նիկոլա Սարկոզիի մրցակից լինելուց:
Քաղաքական շրջանակներում լարվածություն է առաջացրել New York Review of Books շաբաթաթերթում տպագրված հրապարակումը, որտեղ հայտնի ամերիկացի լրագրող Էդվարդ Ջեյ Էպսթեյնը հրապարակել է նյույորքյան Sofitel հյուրանոցում տեղի ունեցած միջադեպի սեփական հետաքննության արդյունքները: Այդ հրապարակման մեջ ամրապնդվում է այն տեսակետը, որ Սթրոս Կանի ձերբակալությունը դավադրության մի մասն է, որի նպատակն էր խանգարել վերջինիս առաջադրվել որպես Ֆրանսիայի նախագահի թեկնածու:
Էպսթեյնն իր հոդվածում տալիս է դեպքերի քրոնիկան` ենթադրյալ բռնաբարությունից առաջ և հետո: Նա գրում է, որ մուտք է ունեցել դեռ չհրապարակված տվյալների բազա` հյուրանոցում էլեկտրոնային բանալիների կիրառման մանրամասներից, հսկիչ տեսախցիկներից կատարված տեսաձայնագրություններից մինչև մայիսի 14-ը նյույորքյան հյուրանոցների սեփականատեր ֆրանսիական Accor ընկերության անվտանգության ծառայության աշխատակից Ջոն Շիխենի հեռախոսից արված զանգերի մասին տեղեկությունները:
The Washington Post-ը բերում է Էպսթեյնի հետաքննության ամենավիճելի պահերը:
Առաջին՝ տարօրինակ էր Սթրոս Կանի հեռախոսի կորուստը: Սթրոս Կանը կարծում էր, թե այն թողել է հյուրանոցում, չնայած ոչ ոստիկանները, ոչ մասնավոր հետախույզները այն չէին հայտնաբերել: Հնարավոր է, որ հեռախոսը գողացել էին կամ էլ այն անջատվել էր, որի համար պահանջվում են հատուկ տեխնիկական գիտելիքներ: Դատելով այս ամենից՝ սմարթֆոնը դուրս չի բերվել Sofitel հյուրանոցից:
Երկրորդ՝ համաձայն էլեկտրոնային բանալիների կիրառման օրենքների, հյուրանոցի սպասուհին համար է մտել երկու անգամ, Սթրոս Կանի հանդիպումից հետո, իսկ առաջին անգամ, երբ «Սթրոս Կանը դեռ դուրս չէր եկել հյուրանոցից, և հնարավոր է, որ եղել է դեռ սենյակում»: Քննիչների համար պարզ չէր, թե ինչու է սպասուհին իրենցից թաքցրել իր այցը: Accor-ը վստահեցնում է, որ Սթրոս Կանը հյուրանոցը լքել է նախքան սպասուհին մաքրել է այդ սենյակը և վերադարձել իր ջնջոցների հետևից:
Երրորդ՝ Էպսթեյնի մոտ հարց է առաջացնում ժամերի դանդաղ ընթացքը: Սպասուհու վրա ենթադրյալ հարձակման մասին ոստիկանությանը հայտնել են 13.31-ին` Շիխենի հաղորդագրությունից հետո: Սպասուհուն հիվանդանոց են տեղափոխել միայն 15.57-ին: Այսինքն` անհայտ է, թե այդ ընթացում ինչ որոշումներ են կայացվել:
Եվ վերջապես չորրորդը՝ չափազանց կասկածելի է «հաղթական» պարը, որը ֆիքսել են հսկիչ տեսախցիկները 911 զանգ ստանալուց հետո: Հյուրանոցի ինժեներական ծառայության ղեկավարը և անծանոթ մի տղամարդ «ծափահարել են և պարել, որը տևել է երեք րոպե»: Accor ընկերությունը հայտարարել է, որ պարը տևել է ընդամենը 8 վայրկյան, սակայն նրանք կտրականապես հերքում են, որ որևէ կապ են ունեցել Սթրոս Կանի հետ:
Հիշեցնենք, որ Սթրոս Կանը ձերբակալվել էր մայիսի 14-ին` Sofitel հյուրանոցի սպասուհուն բռնաբարելու մեղադրանքով: Սակայն հուլիսին հետաքննությունը պարզել է, որ սպասուհին կեղծ ցուցմունքներ է տվել: Սթրոս Կանի դեմ հարցուցված գործը փակվել է օգոստոսի 23-ին: