Հայաստանում ԱՄՆ դեսպանատնից հայտնում են, որ դեսպան Հոլբրուքի հիշատակին` հինգշաբթի և ուրբաթ օրերին ժամը 10:00-ից մինչև 17:00 Երևանում ԱՄՆ դեսպանությունում կբացվի ցավակցությունների գիրք, որտեղ իրենց գրառումները կարող են թողնել բոլոր ցանկացողները:
«Դեսպան Հոլբրուքը ամերիկյան բարձրաստիճան դիվանագետներից մեկն է, ով աչքի է ընկել իր խաղաղարար գործունեությամբ ու Բոսնիայի խաղաղ բանակցային կարգավորման հարցում ունեցած իր ներդրմամբ: 2009թ. հունվարի 22-ին դեսպան Հոլբրուքը նշանակվել է Պակիստանի և Աֆղանստանի հարցերով հատուկ խորհրդական` աշխատելով նախագահ Օբամայի ու պետքարտուղար Քլինթոնի ղեկավարության ներքո: Այս պաշտոնում նա ծառայեց մինչև իր մահը` 2010թ. դեկտեմբերի 13-ը:
Նախագահ Օբաման բնութագրում է դեսպան Հոլբրուքին որպես «իրապես բացառիկ գործիչ, որին միշտ կհիշենք իր անխոնջ դիվանագիտության, երկրի հանդեպ տածած սիրո և խաղաղությանը հետամուտ լինելու համար»: Ըստ պետքարտուղար Հիլարի Քլինթոնի ի դեմս դեսպան Հոլբրուքի «Ամերիկան կորցրել է կարկառուն մարտիկի և հանրային ծառայության մեծ նվիրյալի»:
ՀՀ-ում ԱՄՆ դեսպանության հասցեն է. ք. Երևան, Ամերիկյան փող. 1
Ուղերձներ կարող եք թողնել նաև ցավակցությունների էլեկտրոնային գրքում, որի հասցեն է. www.state.gov/holbrooke», տեղեկացնում են ԱՄՆ դեսպանատնից: