Իշխանությունները կեղծ հարցումներ են անցկացնում և համոզված են, որ միակն են ու անփոխարինելի: Այսօր ՀԱԿ հանրահավաքում այս մասին հայտարարեց «Հանրապետություն» կուսակցության նախագահ Արամ Սարգսյանը:
«Մտածում են, մի քանի պոպուլիստական հայտարարություններով ժողովրդի քվեն կստանան, բայց այդպես չէ: Գնում են մարզեր՝ հանիպումների, ուր ժողովուրդը նրանց հանդիպումներին չի գալիս: Դրա համար էլ ժողովրդի հանդեպ վրեժով են լցվում: Բայց ելք կա՝ դա հրաժարականն է, արտահերթ ընտրությունները և ոչ միայն:
Ես համոզված եմ, որ այս երկրում ապրող մարդն արժանի է ավելի լավ կյանքի, ոչ թե հեռանա օտար ափեր՝ հանապազօրյա հացը վաստակելու: Մենք պետք է միավորվենք, մեր ուժը պիտի լինի մեր համախմբվածությունը: Մենք հասնելու ենք մեր նպատակին: Մենք ապացուցելու ենք, որ արդար, ազնիվ և բացճակատ ենք ապրելու»,- ասաց Սարգսյանը: