Թուրքական Milliyet թերթը, վկայակոչելով թուրքական հետախուզությունում ունեցած իր աղբյուրները, հայտնում է, որ սիրիական իշխանություններն իրենց տարածքում ստեղծել են Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալների նախապատրաստման բազա։
Քուրդ զինյալների այդ բազան գտնվում է Թուրքիայի սահմանից ոչ հեռու ընկած սիրիական Ռաս Ալ-Էյն քաղաքի մոտ։ Այդ բազայում ռազմական ու քաղաքական պատրաստություն է անցնում ավելի քան 150 մարդ։ Չի բացառվում, որ Հյուսիսային Իրաքում գտնվող PKK-ի այլ ճամբարներից այստեղ տեղափոխվեն նոր ճամբարներ։
Թուրքական թերթի կարծիքով՝ սա Դամասկոսի պատասխանն է Անկարային, որն իր մոտ է ընդունել Սիրիայի Ազգային խորհրդի ղեկավարությանն ու ընդդիմադիր կառույցներին, որոնք պահանջում են նախագահ Ասադի հրաժարականը։
Հիշեցնենք, որ ավելի վաղ Ասադը հայտարարել էր, թե Թուրքիան զենք է մատակարարում սիրիացի ընդդիմադիրներին։
