Հայաստանի Հանրապետության արտաքին գործերի նախարարության դիվանագիտական դպրոցը հայտարարում է 2011թ. «Միջազգային հարաբերություններ եւ դիվանագիտություն» դասընթացի մասնակցության մրցույթ:
Դասընթացը նախատեսված է բարձրագույն կրթական հաստատությունների շրջանավարտների համար: Դասավանդման լեզուներն են` հայերենը, անգլերենը եւ ռուսերենը: Նշված լեզուների լավ իմացությունը պարտադիր է: Ուսումնական ծրագիրը կազմված է տեսական եւ գործնական առարկաներից:
Ընդունելությանը կարող են մասնկակցել բարձրագույն կրթություն ունեցող մինչեւ 30 տարեկան ՀՀ քաղաքացիները, ովքեր ստացել են ՀՀ կառավարության 2002թ. փետրվարի 3-ի N121 որոշմամբ հաստատված «Դիվանագիտական ծառայության պաշտոն զբաղեցնելու համար անհրաժեշտ բարձրագույն կրթական մասնագիտությունների ցանկով»* սահմանված որակավորում: Դասընթացը կմեկնարկի 2011թ. փետրվարի 15-ին եւ կավարտվի 2011թ. դեկտեմբերին: Ուսումն անվճար է:
Ներկայացվելիք փաստաթղթերի ցանկ.
1. Դիմում (դիմումի ձեւն անհրաժեշտ է ստանալ ԱԳՆ-ից կամ բեռնել կայքից)
2. Ինքնակենսագրություն շարադրված ազատ ձեւով (մինչեւ 1 էջ)
3. Դասընթացներին մասնակցելու նպատակի համառոտ նկարագիր (մինչեւ 1 էջ)
4. 3 լուսանկար (3×4սմ)
5. Անձնագրի պատճենը
6. Սոցիալական քարտի պատճենը
7. Առողջական վիճակի մասին սահմանված ձեւի տեղեկանք
8. Բարձրագույն ուսումնական հաստատության դիպլոմի պատճենը
9. Դիմումում ներկայացված տեղեկությունները հաստատող այլ փաստաթղթեր
Ունկնդիրների նախնական ընտրությունը կատարվելու է նշված փաստաթղթերի հիման վրա: Փաստաթղթային ընտրությունն անցած դիմորդները կհրավիրվեն գրավոր քննության (միջազգային հարաբերությունների / արտաքին քաղաքական թեմայով շարադրություն), որը տեղի կունենա 2011թ. հունվարի 26-ին: Գրավոր քննությունը հաջողությամբ անցած դիմորդները 2011թ. փետրվարի 3-ին կհրավիրվեն բանավոր հարցազրույցի` որը կարող է անցկացվել վերոնշյալ երեք լեզուներով: Լավագույն 25 դիմորդները հնարավորություն կստանան մասնակցել դասընթացին:
Ուսումնական ծրագրի ընթացքում յուրաքանչյուր առարկայով կամ թեմայով դասախոսությունների շարքի ավարտից հետո ունկնդիրները կհանձնեն քննություններ, որոնց արդյունքները, ավարտական քննության եւ պրակտիկայի գնահատականների հետ, մաս կկազմեն հանրագումարային գնահատականի: Դասընթացը հաջողությամբ ավարտած ունկնդիրները կստանան ավարտական վկայական: Լավագույնները ՀՀ օրենքների պահանջներին համապատասխան կարող են աշխատանքի ընդունվել ԱԳՆ համակարգում:
Դասընթացն անցկացվելու է ՀՀ ԱԳՆ վարչական շենքում` Դիվանագիտական դպրոցում: Աշխատող ունկնդիրները պետք է հաշվի առնեն, որ դասերը անցկացվելու են շաբաթական մինչեւ 5 օր, մինչեւ հնգական ակադեմիական ժամ տեւողությամբ:
Փաստաթղթերի ընդունումը կատարվելու է ս.թ.հունվարի 11-ից մինչեւ 21-ը ՀՀ դիվանագիտական դպրոցում` Հանրապետության հրապարակ, Կառավարության 2 շենք, Երեւան 0010 հասցեով, յուրաքանչյուր աշխատանքային օր` ժ.10.00-13.00:
Լրացուցիչ տեղեկությունների համար դիմել ԱԳՆ դիվանագիտական դպրոց, Հասմիկ Իսրայելյանին (010583928 /ներք.336/), [email protected]):
* «Դիվանագիտական ծառայության պաշտոն զբաղեցնելու համար անհրաժեշտ բարձրագույն կրթական մասնագիտությունների ցանկին» եւ «Ծառայողական պարտականությունների եւ լիազորությունների իրականացմանը խոչընդոտող հիվանդությունների ցանկին» կարելի է ծանոթանալ ՀՀ ԱԳՆ կայքում: