Մամուլի ազգային ակումբի և ԱՄՆ Ազգային ժողովրդավարական ինստիտուտի հրավիրած «Հայաստանի քաղաքական օրակարգի առաջնահերթությունները. ձևավորման սկզբունքները և հարցադրումների առաջադրման ընթացակարգը» թեմայով քննարկման ժամանակ ԱԺ «Ժառանգություն» խմբակցության ղեկավար Ստյոպա Սաֆարյանը հայտարարեց, որ Հայաստանում գոյություն չունեն քաղաքական օրակարգեր: «Ժառանգություն» խմբակցության ղեկավարի դիտարկմամբ` Հայաստանի քաղաքական համակարգին բնորոշ է կանխատեսել չկարողանալը և իրավիճակը ախտորոշել չկարողանալը: «Այն, ինչ համարվում է օրակարգ, պարտադրված է իշխանությունների կողմից: Խնդիրներ կան, որոնք գտնվում են ընդդիմության դաշտում և առաջնահերթ չեն ճանաչվում իշխանությունների կողմից»,- ասաց Ստյոպա Սաֆարյանը: ԱԺ պատգամավորը հիշեցրեց, որ շուտով կլրանա երկու տարին, ինչ իշխանությունները նախաձեռնել են հայ-թուրքական հարաբերությունների կարգավորմանն ուղղված քաղաքականություն, սակայն այսօր ունենք WikiLeaks կայքի հրապարակումներ, որոնք ցույց են տալիս, որ դրանք անկեղծ ցանկություն չեն եղել: Ըստ Ստյոպա Սաֆարյանի` WikiLeaks-ի հրապարակումները ցույց են տալիս, որ Հայաստանի քաղաքականությունն ուղղված է եղել նավթագազամուղային քաղաքականությունը սպասարկելուն: Ստյոպա Սաֆարյանը հիշեցրեց նաև, որ ընդդիմությունը ժամանակին իշխանությունների նախաձեռնողական քաղաքականությունը համարել է վտանգավոր, քանի որ հայ-թուրքական հարաբերությունների կարգավորումը կապվում էր Լեռնային Ղարաբաղի խնդրի հետ: Ստյոպա Սաֆարյանը նշեց, որ այսօր ընդդիմության խնդիրը անցնցում իշխանափոխությունն է, որպեսզի չլինեն նոր մարտի 1-եր: Մինչդեռ, ըստ «Ժառանգության» պատգամավորի, իշխանությունն արհեստական խնդիրներ է ստեղծում, ինչպիսիք օրինակ` «Վիշապի կոթողներ»-ը քանդելն է: ՀՌԱԿ փոխատենապետ Էդվարդ Անտինյանի կարծիքով` մի փոքր WikiLeaks էլ մեզ մոտ տեղի ունեցավ` Երևանի քաղաքապետի պաշտոնանկությամբ:
