«ՌԴ ԱԳ նախարարի հատուկ ներկայացուցիչ Իգոր Խովաևի հետ հանդիպմանը ես բացատրեցի Իրանի դիրքորոշումը տարածաշրջանի խնդիրների վերաբերյալ՝ նշելով Կովկասում որոշ արտատարածաշրջանային խաղացողների առկայության ապակայունացնող հետևանքները: Կովկասում խաղաղությունն ու կայունությունը պահպանելու համար անհրաժեշտ է ավելի մեծ համակարգում և համագործակցություն Իրանի, Ռուսաստանի և տարածաշրջանային այլ կառավարությունների միջև», – X-ում գրել է Իրանի ԱԳ նախարարի պաշտոնակատար Ալի Քանին:
Նա ՌԴ ԱԳ նախարարի կովկասյան հարցերի հատուկ ներկայացուցիչ Խովաեւի հետ հանդիպել է Թեհրանում: Սա նշանակում է, որ Լավրովի հատուկ ներկայացուցիչը Թեհրան է մեկնել շատ կոնկրետ հարց քննարկելու համար: Արդյո՞ք Իրանի ԱԳ նախարարի պաշտոնակատարը որեւէ առարկություն է ունեցել Խովաեւի ներկայացրած որեւէ առաջարկի վերաբերյալ: Համենայն դեպս, նրա գրառման մեջ առկա ձեւակերպումը, որ Խովաեւի «բացատրել» է Իրանի դիրքորոշումը ռեգիոնալ խնդիրների վերաբերյալ, թողնում է բազմիմաստ տպավորություն:
Իհարկե նաեւ հնարավոր է, որ ՌԴ ԱԳՆ հատուկ ներկայացուցիչը Թեհրան է այցելել ոչ թե առաջարկով, այլ առաջարկ պատրաստելու վերաբերյալ դիրքորոշումների հստակեցման նպատակով, ինչի առնչությամբ էլ Իրանի ԱԳ նախարարի պաշտոնակատարը «բացատրել» է Իրանի վերաբերմունքը: Հատկանշական է, որ Խովաեւի այցը Թեհրան տեղի է ունենում Թուրքիայի արտգործնախարար Ֆիդանի Ռուսաստան կատարած այցից օրեր անց: Ֆիդանի Ռուսաստան այցը հատկանշական էր:
Մեկնելով Կազան՝ ԲՐԻԿՍ արտգործնախարարների հավաքին, Թուրքիայի արտգործնախարարը Մոսկվայում ունեցել է ուշագրավ հանդիպումների շարք՝ արտաքին հետախուզության պետ Նարիշկինի, անվտանգության խորհրդի քարտուղար Շոյգուի եւ ընդհուպ նախագահ Պուտինի հետ: Ինչպես առիթ ունեցա գնահատել, հանդիպումների այդ «կասկադը» հուշում է, որ Ֆիդանը ըստ ամենայնի առաջարկների փաթեթ է ներկայացրել Մոսկվային՝ ռուս-թուրքական հարաբերության «ռեսթարտի» համար: Հնարավոր է, որ Խովաեւի Թեհրան այցը պայմանավորված է դրանց վերաբերյալ Իրանի դիրքորոշումները հասկանալու ձգտումով: Այդ ֆանոին, Ալի Բաղերի Քանիի բազմիմաստ գրառումը հուշում է, որ Թեհրանը դրանց առնչությամբ ունի վերապահումներ:
