Ֆրանսիայի արտգործնախար Ալեն Ժյուպեի առաջարկությունը՝ հյուրընկալել Հայոց ցեղասպանության շուրջ հայ-թուրքական քննարկումները, համարժեք է Հայոց ցեղասպանությունը հերքող հայտարարության, այն պարագայում, երբ երկրի նախագահը՝ Նիկոլա Սարկոզին, խոսում է Ցեղասպանության ուրացման քրեականացման մասին օրինագծի անհրաժեշտության մասին, իսկ հոկտեմբերի 6-ին Երևանում կոչ անում Թուրքիային առերեսվել սեփական հետագծի հետ ու ճանաչել Հայոց ցեղասպանությունը։ «Առաջին լրատվական»-ի հետ զրույցում նման տեսակետ հայտնեց ՀՅԴ պատգամավոր Լիլիթ Գալստյանը՝ նկատելով, որ այս հակադրությունն առնվազն տարօրինակ է, եթե ոչ զավեշտական կամ անբարո։
«Կարծում եմ` նախ Ֆրանսիան ինքը պիտի հստակեցնի իր խաղի կանոնները կամ գոնե հնարավորինս ազնիվ լինի (թեև քաղաքականության, այն է՝ արտաքին քաղաքականության մեջ ի՛նչ արժեք ունեն բարոյականությունը կամ ազնվությունը)։ Կարծում եմ` արտաքին քաղաքականության թիվ մեկ պատասխանատուն՝ երկրի նախագահը, չէր կարող տեղեկացված կամ իրազեկ չլինել։ Սա, ինչպես ասում են, իրենց իմանալիքն է ու վարքականոնը։
Ավաղ, իրականությունն այն է, որ Ցեղասպանության խնդիրը շարունակում է քաղաքական և հատկապես նախընտրական շահարկման խաղաթուղթ ծառայել մեծ տերությունների (խաղացողների) ձեռքին։ Իսկ մեզ մնում է՝ չբոբիկանալ, թացը չորից ջոկել և մեր քաղաքական համակրանքներում, այդ թվում՝ ֆրանսահայ համայնքի ձայների պարագայում, ճիշտ կողմնորոշվել»,- նկատեց խորհրդարանականը:
Նրա խոսքով, խոցելի չլինելու, արտաքին ճնշումներին չենթարկվելու կամ արտաքին քաղաքականության մեջ «չգցվելու» համար ներքին քաղաքական ողջամտություն է հարկավոր, հանրային համախոհության վրա կառուցած ժողովրդավարական երկիր։ «Որ հետո էլ չարդարանանք, թե մեր շերեփը թղթից էր»,- ամփոփեց Լիլիթ Գալստյանը
Նշենք, որ Ֆրանսիայի արտգործնախարար Ալեն Ժյուպեն Անկարայում 1915 թվականի իրադարձությունների թեման «մարտահրավեր» էր անվանել` իր երկրի պատրաստակամությունը հայտնելով հյուրընկալել դրա շուրջ հայ-թուրքական քննարկումները: