Ադրբեջանական 1news.az-ին տված հարցազրույցում ԵՄ արտաքին քաղաքականության ծառայության (EEAS) ղեկավար Մայա Կոչիյանչիչն անդրադարձել է ղարաբաղյան հակամարտության կարգավորման գործընթացում ԵՄ-ի հնարավոր դերակատարությանը.
«Ղարաբաղյան հակամարտության կարգավորման գործընթացում ԵՄ-ն իր դերը տեսնում է որպես ԵԱՀԿ Մինսկի խմբի լրացում։ ԵՄ-ն աջակցում է հակամարտող կողմերի միջև վստահության ամրագրմանն ուղղված ջանքերին։ ԵՄ-ը շարունակում է հասնել ղարաբաղյան հակամարտության խաղաղ կարգավորմանը՝ ԵԱՀԿ Մինսկի խմբի ջանքերին աջակցելու միջոցով։
ԵՄ-ը բազմիցս հաստատել է հակամարտությունից տուժած շրջանների վերակառուցման ու վերականգնման հարցում աջակցություն ցուցաբերելու իր պատրաստակամությունը։ Սակայն դա տեղի կունենա խաղաղության պայմանագրի կնքումից հետո»։
Հիշեցնենք, որ օրեր առաջ բուլղարական Focus գործակալությանը տված հարցազրույցի ժամանակ Euronest-ի Խորհրդարանական ասամբլեայի համանախագահ, Եվրախորհրդարանի պատգամավոր Քրիստիան Վիգենինը հայտարարել էր, որ ԵՄ-ը ցանկանում է առավել ակտիվ լինել ղարաբաղյան հակամարտության կարգավորման գործընթացում.
«Ոչ վաղ անցյալում Եվրախորհրդարանում տեղի ունեցան ԵԱՀԿ Մինսկի խմբի ֆրանսիացի համանախագահին ԵՄ ներկայացուցչով փոխարինելու վերաբերյալ քննարկումներ։ ԵՄ-ի տվյալ ներկայացուցիչ կարող է դառնալ Քեթրին Էշթոնը։ Ղարաբաղյան հակամարտության կարգավորված չլինելը տարիներ ի վեր լարված մթնոլորտ է առաջացնում։ Այդ ընթացքում աննշան առաջընթաց է գրանցվել։ Ինձ թվում է, որ ԵՄ-ի ավելի ակտիվ ջանքերը կփոխեն իրավիճակը»։