Ադրբեջանական Turan լրատվական գործակալությանը տված հարցազրույցի ժամանակ Մարդու իրավունքների գծով եվրակոմիսար Թոմաս Համարբերգը քննադատել է ադրբեջանական իշխանություններին Ադրբեջանում մարդու իրավունքների խախտումների ու խոսքի ազատության սահմանափակման համար.
«Ես մտահոգ եմ Ադրեջանում տիրող այն դժվարությունների կապակցությամբ, որոնց վերջին շրջանում բախվում են շատ իրավապաշտպաններ։ Ընդ որում, դա վերաբերում է թե՛ տեղի, թե՛ Ադրբեջանում գործունեություն ծավալած օտարազգի իրավապաշտպաններին։
Ինձ հատկապես մտահոգում է Բաքվի կենտրոնում որոշ շինությունների ավերումը, ուր տեղակայված էին մի շարք հասարակական կազմակերպություններ, այդ թվում՝ նաև Լեյլա Յունուսի գլխավորած Խաղաղության ու ժողովրդավարության ինստիտուտը։
Ադրբեջանական իշխանությունները նպատակամղված են գնացել այդ քայլին, քանի որ Լեյլա Յունուսը նրանց կտրուկ քննադատել է կոռուպցիայի մեջ ներքաշված լինելու, մարդկանց բռնի ուժով իրենց տներից վտարելու և սեփականատիրության իրավունքների կոպիտ ոտնահարման համար։
Ես ադրբեջանական իշխանություններին կոչ եմ անում հետաքննել այս փաստերը և պատասխանատվության ենթարկել նրանց, ովքեր ավերել են Խաղաղության ու ժողովրդավարության ինստիտուտը, ինչպես նաև համապատասխան փոխհատուցում վճարել կորսված ունեցվածքի համար։
Ես նաև մտահոգ եմ այս տարվա մարտին Ադրբեջանում «Մարդու իրավունքների տուն» իրավապաշտպան հիմնադրամի ադրբեջանական մասնաճյուղի փակման կապակցությամբ։ Հուսով եմ, որ ադրբեջանական իշխանությունները կկատարեն մարդու իրավունքների պաշտպանության ոլորտում իրենց ստանձնած պարտավորությունները՝ ներառյալ ազատ հանրահավաքների անցկացումը, ինչը ժողովրդավարական հասարակության հիմնական իրավունքներից մեկն է»։
Հիշեցնենք, որ այս տարվա սեպտեմբերի վերջին Ադրբեջանի վերաբերյալ իր զեկույցում Համարբերգը նշել էր, որ Ադրբեջանը շարունակում է ոտնահարել հիմնարար ազատությունները՝ ընդգծելով, որ նա անտեսել է ավելի վաղ իր ներկայացրած առաջարկները.
«Ես առաջարկել էի վերջ դնել լրագրողների անհիմն քրեական հետապնդումներին։ Սակայն նման դեպքերը չդադարեցին։ Կեղծ մեղադրանքներով ձերբակալվել են պատգամավորության թեկնածուներ, լրագրողներ և երիտասարդ ակտիվիստներ։ Նման սպառնալիքները հակասում են մարդու իրավունքների սկզբունքների և օրենքի գերակայության վրա հիմնված ժողովրդավարական հասարակության սկզբունքներին։ Պետք է անհապաղ քայլեր իրականացվեն իրենց հայացքների համար բանտարկված բոլոր մարդկանց ազատ արձակելու համար»։
