Թե ինչը ստիպեց Շիրակի մարզի Ջրառատ գյուղի միջնակարգ դպրոցի ուսուցչին ինքնասպան լինել, մինչև այսօր պարզ չէ, սակայն նրա համագյուղացիները չեն համակերպվում ուսուցչի կորստի և ինչպես իրենք են բնորոշում` անհեթեթ մահվան հետ:
Շիրակի մարզի Ջրառատ գյուղի բնակիչներին նոյեմբերի 16-ին Ջրառատի միջնակարգ դպրոցի աշխատանքի ուսուցման ուսուցիչ, ինչպես նաև դպրոցի պահակ 64-ամյա Անուշավան Դարբինյանի ինքնասպանության լուրը ցնցել և զարմանք է պատճառել. ուսուցիչը կենսախինդ բնավորություն ուներ, հավասարակշռված էր, և որևէ մեկը նման քայլ չէր սպասում նրանից:
Հիշեցնենք, որ Անուշավան Դարբինյանն իր տան երկրորդ հարկի աստիճաններից էր կախվել` թողնելով գրություն, որտեղ նշել էր, որ իր մահվան մեջ որևէ մեկին չմեղադրեն:
Ջրառատ գյուղի գյուղապետ Ահարոն Ոսկանյանը մեզ հետ զրույցում նշեց, որ դատաբժշկական եզրակցությունը ցույց է տվել, որ կապտուկները պարանոցի շրջանում կախվելու արդյունքում են առաջացել. «Հավասարակշռված անձնավորություն էր, երբեք չէինք սպասի նման բան, հիմա թե ի՞նչ է մտածել, որ նման քայլի է դիմել՝ անհայտ է, քանի որ իրենց վիճակը ոչինչ էր»,- ասաց գյուղապետը` ավելացնելով, որ հնարավոր է նաև պարտքերի պատճառով նման քայլի դիմեր, սակայն ի տարբերություն մյուս գյուղացիների, նա անհամեմատ լավ էր ապրում, որևէ Ճնշումների էլ չի ենթարկվել, տարօրինակություններ էլ չուներ:
Անուշավան Դարբինյանը մանկավարժի 41 տարվա աշխատանքային փորձ ուներ: 72 թվականից դասավանդել է Ջրառատի միջնակարգ դպրոցում գծագրություն և կերպարվեստ, իսկ վերջին երկու տարիներին դասավանդում էր գծագրություն և աշխատանքի ուսուցում:
Դպրոցի տնօրեն Արա Սուքիասյանը պատմեց, որ երկուշաբթի օրը` նոյեմբերի 14-ին, Անուշավան Դարբինյանն աշխատանքի է եկել, սովորականի պես դասը պարապել, գնացել է տուն: Երեքշաբթի դաս չի ունեցել, չի եկել դպրոց. «Ինքն աշխատանքի ուսուցման չորս ժամ ուներ, և մեկ ժամ էլ գծագրություն: Եվ նաև պահակն էր, 41 տարվա մանկավարժական ստաժ ուներ, տղաների հետ ինքն էր պարապում, դպրոցի հետ երբեք պրոբլեմ չի ունեցել, երեխաների հետ լավ հարաբերությունների մեջ էր»,- շեշտեց Արա Սուքիասյանը:
Գյուղամեջում տարբեր քննարկումներ և վարկածներ են պտտվում, թե ինչը իրենց համագյուղացուն կարող էր ինքնասպանության դրդել:
Ամենահավանական վարկածը համարում են պարտքերը, քանի որ մեկ առ մեկ գրել է` ում ինչքան է պարտք: Մեկ վարկածի համաձայն էլ` Անուշավան Դարբինյանը վերջերս շատ է դժգոհել իր ապրած կյանքից: Կինը փոստում է աշխատում, իսկ նա էլ հաճախ է օգնել կնոջն աշխատանքում:
Անուշավան Դարբինյանի երեք որդիներն արտագնա աշխատանքի են մեկնել Ռուսաստանի Դաշնություն, և ընտանիքը երբեք իր ապրուստից շատ չի դժգոհել: Մի շարք անուններ է գրել թողել, որոնց պարտք է եղել:
Տնօրենից հետաքրքրվեցինք ուսուցչի աշխատավարձի չափի մասին. 51 հազար դրամ աշխատավարձն է կազմել, իսկ 28 հազար էլ մանկավարժական թոշակը:
Տնօրենից ճշտեցինք` գուցե նրան կրճատելու մասին խոսակցություննե՞ր են եղել, սակայն այս վարկածն էլ բացառված է, քանի որ նա իր գործի վարպետ էր, դպրոցին շատ մոտ կանգնած անձնավորություն:
Դեպքի առթիվ հարուցվել է քրեական գործ ոստիկանության Ախուրյանի քննչական վարչությունում:
Ըստ հոգեբանների` մարդկանց 80 տոկոսն իր կյանքի փուլերից մեկում մտածում է ինքնասպանության մասին, և ավելի շատ այդ քայլին դիմում են տղամարդիկ, և զարմանալիորեն ինքնասպանության դիմում են էնտուզիազմով, կենսախինդ և կյանքը շատ սիրող մարդիկ: