Այսօր «ՀայՌուսգազարդ» ՓԲԸ-ն «Առէկսիմբանկ-Գազպրոմբանկի խումբ» ՓԲԸ-ի և ԱԿԲԱ-ԿՐԵԴԻՏ-ԱԳՐԻԿՈԼ բանկերի հետ ստորագրել է հանաձայնագիր սպառված բնական գազի դիմաց վճարումների նոր մեխանիզմ կիրառելու վերաբերյալ:
Ընկերությունից «Առաջին լրատվական»-ին հայտնեցին, որ ջեռուցման սեզոնին ընդառաջ և բնակիչների սոցիալական հոգսերը թեթևացնելու նպատակով՝ «ՀայՌուսգազարդ» ՓԲԸ-ն բաժանորդների համար մշակել է սպառված բնական գազի դիմաց վճարումների հարմարավետ և ճկուն մեխանիզմ, որը հնարավորություն է ընձեռում, մասնավորապես ձմռանը, ամսական վճարումները կատարել հավասարաչափ մարումներով և անհամեմատ մատչելի եղանակով:
«ՀայՌուսգազարդ» ՓԲԸ գլխավոր տնօրենի տեղակալ Կարեն Մովսեսյանի խոսքերով, լինելով Հայաստանի խոշորագույն ընկերություններից մեկը և ուշադրության կենտրոնում պահելով սոցիալական պատասխանատվության քաղաքականությունը, մշակվել և ներդրվել են այնպիսի մեխանիզմներ, որոնք հնարավորինս մատչելի են դարձնում գազ սպառող բաժանորդների վճարային պարտավորությունների կատարումը: Նախագծի գաղափարը հետևյալն է. գազ սպառող բաժանորդները, օգտվելով բանկի կողմից տրամադրվող վարկային գծերից, հնարավորություն են ստանում տարվա ընթացքում բնական գազի սպառման դիմաց վճարումները կատարել ամսական հավասարաչափ մարումներով՝ այդպիսով թեթևացնելով ձմռան ամիսների ֆինանսական ծանրաբեռնվածությունը։
Այսինքն՝ բաժանորդը տարվա բոլոր ամիսներին վճարում է միևնույն ֆիքսված գումարը բանկին, իսկ գազի սպառման դիմաց վճարը «ՀայՌուսգազարդ» ՓԲԸ-ին կատարում է բանկը։ Այս մեխանիզմի հիմքում դրված է նաև «ամռան ամիսներին ձմռան ամիսների համար կուտակելու» գաղափարը։
