РБК-ի փոխանցմամբ՝ առաջիկայում Թուրքիան և Բուլղարիան ստորագրելու են երկու երկրներին միմյանց կապող գազատարի կառուցման վերաբերյալ քաղաքական համաձայնագիր։ Դրա նպատակը արտակարգ ժամանակներում (իրավիճակներում) Թուրքիայից Բուլղարիա «կապույտ վառելիքի» մատակարարումների ապահովումն է։
Այսպիսի պայմանավորվածություն է ձեռք բերվել Ստամբուլում տեղի ունեցած 3-րդ Սևծովյան էներգետիկ ու տնտեսական ֆորումում՝ Թուրքայի և Բուլղարիայի էներգետիկայի նախարարներ Թաներ Յըլդըզի ու Տրայչո Տրայկովի միջև։ Նրանք ընդգծել են, որ այդ նախագիծը ռազմավարական նշանակություն ունի երկու երկրների համար։
Ենթադրվում է, որ հեռանկարում թուրք-բուլղարական գազատարը կարող է ոչ միայն Բուլղարիային, այլև՝ ողջ Բալկանյան տարածաշրջանին ապահովել Կասպիցի գազի մատակարարումներով։ Թուրք-բուլղարական գազատարի երկարությունը կազմելու է 77 կիլոմետր, իսկ տարեկան թողունակությունը՝ 1-3 միլիարդ խորանարդ մետր՝ հետագայում այն ավելացնելու հնարավորությամբ։
Տրայկովն ընդգծել է, որ այդ 77 կիլոմետրանոց գազատարի կառուցման ներդրումները հարաբերականորեն մեծ չեն լինի, մինչդեռ Բուլղարիայի ու ողջ տարածաշրջանի օգուտները վիթխարի կլինեն։
Նշվում է, որ ներկայումս Բուլղարիան գործնականում ամբողջովին կախված է ռուսական գազի ներկրումից և ակտիվորեն մշակում է գազի ներկրման այլընտրանքային տարբերակներ։ 2009 թվականի ձմռանը Բուլղարիան ավելի քան մեկ շաբաթով անգազ էր մնացել ռուս-ուկրաինական գազային վեճի պատճառով։
Հիշեցնենք, որ այս տարվա օգոստոսի վերջին Թուրքիայի էներգետիկայի նախարար Թաներ Յըլդըզը վերջնագիր էր ներկայացրել Ռուսաստանին` Թուրքիային հատկացվող գազի գինը նվազեցնելու վերաբերյալ: Ըստ Յըլդըզի` ռուսական «Գազպրոմ»-ը վերջին 29 ամիսների ընթացքում 39 տոկոսով բարձրացրել է գազի գինը։
Սակայն ռուսական կողմը չարձագանքեց դրան, որից հետո Թուրքիան հայտարարեց, թե չի երկարաձգում դեռեւս 25 տարի առաջ կնքված գազային համաձայնագրի ժամկետը, որը սպառվում էր այս տարեվերջին: Ըստ դրա` Ռուսաստանը Արևմտյան գազատարով (Ուկրաինա, Ռումինիա, Բուլղարիա) տարեկան 6 միլիարդ խորանարդ մետր գազ էր հատկացնում Թուրքիային:
Թուրքիայի այդ քայլը Ռուսաստանին դնում է Ուկրաինայից տարանցիկ կախվածության մեջ, իսկ Ռումինիային ու Բուլղարիային (մասամբ նաև Ուկրաինային) զրկում ռուսական գազի տարանցումից։