Սահմանադրական դատարանի իրավախորհրդատվական վարչության պետ Լիանա Հակոբյանը այսօր լրագրողների հետ հանդիպման ժամանակ անդրադարձավ Խոսքի ազատության պաշտպանությունը և ՀՀ քաղաքացիական օրենսգրքի 1087.1 հոդվածի` Սահմանադրությանը համապատասխանության վերաբերյալ Սահմանադրական դատարանի որոշմանը հաջորդող քննարկումներին:
Նա նշեց` 1087,1 վիճարկվող դրույթը եթե իրավակիրառական պրակտիկայում դիտարկվի և կիրառվի սահմանադրաիրավական բովանդակությանը չհամապատասխանող տեսքով, այդ դեպքում կխախտվի ոչ միայն դրույթը, այլ նաև Սահմանադրությունն ու միջազգային իրավական նորմերը:
Հակոբյանի խոսքերով` վիճարկվող դրույթի պարագայում ոչ թե օրենքի կոնկրետ դրույթներն էին իրենց բովանդակությամբ հակասության մեջ մտնում, այլ առկա էր դրանց` Սահմանադրությանը համապատասխան կիրառելիության խնդիր:
Իրավակիրառողի` դատարանի կողմից ՍԴ որոշումը չկիրառելու և խախտելու դեպքում դա կարող է բողոքարկման հիմք լինել, ու եթե բոլոր երեք ատյաններում էլ մարդը չհասնի արդյունքի, ապա գոյություն ունի Մարդու իրավունքների եվրոպական դատարան:
Նա նաև շեշտեց` ըստ ՍԴ 61-րդ հոդված` ՍԴ որոշումը պարտադիր է իրավակիրառողների` դատարանների համար, սակայն այն օրենսդրին չի պարտադրում փոխել օրենքը կամ վիճարկվող դրույթը:
Ինչպես նշեց Հակոբյանը` ՍԴ կողմից վիճարկվող դրույթը հակասահմանադրական չճանաչելու հանգամանքը չի կարող կաշկանդել ԱԺ-ին, և վերջինս ազատ է օրենքում փոփոխություններ ու հստակեցումներ իրականացնել:
Նրա խոսքերով, խոսքի ազատության ոլորտին վերաբերող օրենքները ամբողջ աշխարհում հիմնականում հստակ չեն, և հիմնական բեռն ու կարգավորիչ հատկությունը ընկնում են դատական պրակտիկայի վրա:
Հարցին` 1087.1 վիճարկվող դրույթի վերաբերյալ ՍԴ որոշումից հետո հնարավո՞ր է վերանայել արդեն իսկ կայացված դատական որոշումները, Հակոբյանը պատասխանեց` ՍԴ որոշումը դառնում է վերանայման հիմք միայն անհատական դիմումների դեպքում, իսկ Մարդու իրավունքների պաշտպանը անհատական սուբյեկտ չէ, այլ վերացական սուբյեկտ է, և նրա դիմումը ՍԴ չի կարող հանդիսանալ արդեն կայացված դատական որոշումների վերանայման հիմք:
Հակոբյանը նշեց, որ վիճարկվող օրենքի փոփոխության վերաբերյալ ՍԴ-ն որոշում չկայացրեց, որովհետև այն չէր հակասում Սահմանադրությանը, նաև հավելեց, որ դիմողն ինքը (Մարդու իրավունքների պաշտպան Կարեն Անդրեասյանը`1in.am) ՍԴ նիստում նշեց, որ օրենքը կատարյալ է և անգամ եվրոպական մի շարք երկրների օրենքներից ավելի լավն է: