Ադրբեջանական 1news.az-ին տված հարցազրույցի ժամանակ Միջազգային ճգնաժամային խմբի (ICG) եվրոպական ծրագրերի ղեկավար Սաբինա Ֆրեյզերն անդրադարձել է Ղարաբաղյան հակամարտության կարգավորմանը.
«ԵԱՀԿ Մինսկի խմբի ֆրանսիացի համանախագահի փոխարինումը ԵՄ-ի ներկայացուցչով կարող է նոր ազդակ հաղորդել Ղարաբաղյան բանակցային գործընթացին։ Սակայն դա բարդ և ոչ արագ գործընթաց է։ Ֆրանսիացի համանախագահին ԵՄ-ի ներկայացուցչով փոխարինելը լավ գաղափար է, առավել ևս, որ գոյություն ունի խաղաղության համաձայնագրերի ի կատար ածման համար ԵՄ-ի կողմից զգալի աջակցություն ցուցաբերելու պատրաստակամության համաձայնագիրը։
Խոսքը մայիսին ընդունված Եվրոպական հարևանության քաղաքականության նորացված փաստաթղթի մասին է, ըստ որի՝ ԵՄ-ը պատրաստ է ներգրավվել ձգձգվող հակամարտությունների կարգավորման գործընթացում և մասնավորապես ակտիվացնել իր մասնակցությունն այն ձևաչափերում, որոնցում նա ցայժմ ներառված չէ։
Միևնույն ժամանակ, ես կասկածում եմ, որ Քեթրին Էշթոնը պատրաստ է ստանձնել այդ դերակատարությունը։ Հանդիսանալով ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար՝ Էշթոնի պատասխանատվության գոտու մեջ է մտնում համայն աշխարհի հակամարտությունների կարգավորումը, և նրա համար բարդ կլինի բացառապես Ղարաբաղյան հակամարտության կարգավորման վրա կենտրոնանալը։
Բացի այդ, ԵԱՀԿ Մինսկի խմբի ձևաչափի փոփոխումը բարդ է լինելու, և համանախագահող երկրներից մեկի փոփոխման համար անհրաժեշտ կլինի Հայաստանի ու Ադրբեջանի համաձայնությունը»։
Հիշեցնենք, որ օրեր առաջ բուլղարական Focus գործակալությանը տված հարցազրույցի ժամանակ Euronest-ի Խորհրդարանական ասամբլեայի համանախագահ, Եվրախորհրդարանի պատգամավոր Քրիստիան Վիգենինը հայտարարել էր, որ ԵՄ-ը ցանկանում է առավել ակտիվ լինել Ղարաբաղյան հակամարտության կարգավորման գործընթացում.
«Ոչ վաղ անցյալում Եվրախորհրդարանում տեղի ունեցան ԵԱՀԿ Մինսկի խմբի ֆրանսիացի համանախագահին ԵՄ-ի ներկայացուցիչով փոխարինելու վերաբերյալ քննարկումներ։ ԵՄ-ի տվյալ ներկայացուցիչ կարող է դառնալ Քեթրին Էշթոնը։ Ղարաբաղյան հակամարտության կարգավորված չլինելը տարիներ ի վեր լարված մթնոլորտ է առաջացնում։ Այդ ընթացքում աննշան առաջընթաց է գրանցվել։ Ինձ թվում է, որ ԵՄ-ի ավելի ակտիվ ջանքերը կփոխեն իրավիճակը»։