Այսօր Կրեմլում ՌԴ նախագահ Դմիտրի Մեդվեդևը, Բելառուսի նախագահ Ալեքսանդր Լուկաշենկոն և Ղազախստանի նախագահ Նուրսուլթան Նազարբաևը ստորագրել են միասնական տնտեսական տարածքի ստեղծման վերաբերյալ փաստաթղթերի փաթեթը` Եվրասիական տնտեսական ինտեգրացիայի մասին հռչակագիրը, Եվրասիական տնտեսական հանձնաժողովի մասին պայմանագիրը և այդ հանձնաժողովի աշխատանքի կանոնակարգը։
«Ազատության» փոխանցմամբ` Մեդվեդևը հայտարարել է, որ միասնական տնտեսական տարածքի ձևավորումը կարևոր քայլ է Եվրասիական տնտեսական միության ստեղծման ճանապարհին։
«Սրանով մենք արեցինք հերթական, հզոր քայլը Եվրասիական տնտեսական միության ձևավորման ճանապարհին, որը, անկասկած, որոշելու է մեր երկրների ապագան», – ասել է ՌԴ նախագահը:
Բելառուսի և Ղազախստանի ղեկավարների հետ հանդիպմանը Դմիտրի Մեդվեդևը ստորագրել է նաև Ռուսաստանի Պետդումայի խոսնակ Բորիս Գրիզլովին ուղղված նամակը`Եվրասիական տնտեսական հանձնաժողովի ստեղծման մասին փաստաթուղթը վավերացնելու առաջարկով։
