Ռուսական Regnum լրատվական գործակալության փոխանցմամբ՝ Կառնեգիի հիմնադրամի՝ Կովկասի հարցերով փորձագետ Թոմաս դե Վաալը ArmRADIO-FM107 ռադիոկայանի հետ հարցազրույցի ժամանակ հայտարարել է, որ հայերը չեն հանձնելու Լեռնային Ղարաբաղը, Ադրբեջանը պատրանքների մեջ է.
«Լեռնային Ղարաբաղի ու Ադրբեջանի միջև ռազմական գործողությունների վերսկսման հավանականությունը շատ փոքր է։ Այս տարվա հուլիսին ես այցելեցի Բաքու, և Կազանի հանդիպումից հետո նրա արձագանքն այնպիսին էր, որ նրանք չեն ցանկանում պատերազմ։
Ադրբեջանը զենքի վրա գումարներ է վատնում ոչ թե պատերազմ մղելու, այլ նրա համար, որպեսզի Հայաստանին ստիպեն ներքաշվել սպառազինությունների մրցավազքի մեջ և արդյունքում սնանկանալ։ Կարծում եմ, որ Ադրբեջանը պատրանքների մեջ է։
Անկախ ֆինանսական հնարավորություններից՝ հայկական կողմը միակողմանի զիջումների չի գնա։ Եթե 10-15 տարով հետ գնանք, ապա միանշանակ է, որ Հայաստանն ու Ադրբեջանը գտնվում էին նույն հարթության վրա։ Ներկայումս Ադրբեջանն առավել հարուստ ու ուժեղ երկիր է։
Բայց արդյոք կարելի՞ է դա կապակցել Ղարաբաղյան հիմնախնդրի հետ։ Ո՛չ, չեմ կարծում, քանի որ եթե անգամ Հայաստանն առավել աղքատ ու թույլ երկիր է, նա Ղարաբաղի պաշտպանության համար կանի իր ուժերի սահմաններում ամեն ինչ։ Եվ թեև ես չեմ կարծում, որ Հայաստանը շատ լավ սոցիալ-տնտեսական հեռանկարներ ունի, սակայն դրա հետ մեկտեղ, չեմ կարծում, որ Հայաստանը ստիպված կլինի Ղարաբաղը զիջել Ադրբեջանին»։
