Արժույթի միջազգային հիմնադրամի (ԱՄՀ) եվրոպական դեպարտամենտի տնօրեն Անտոնիո Բորգեշը հրաժարական է տվել տարածաշրջանի համար դժվար ժամանակներում, երբ Եվրամիության ղեկավարները պայքարում են պարտքային ճգնաժամի դեմ:
Ինչպես հայտնում է BBC-ն, Բորգեշը իր հրաժարականը բացատրել է «անձնական խնդիրներով»: Նա նախկինում Լոնդոնում զբաղեցրել է Goldman Sachs տնօրենների խորհրդի փոխնախագահի պաշտոնը: Անցած ամիս Բորգեշը ստիպված էր հրաժարվել իր խոսքերից, երբ հայտարարել էր, թե ԱՄՀ-ն կարող է մարել Իսպանիայի և Իտալիայի պարտքերը` օգնելու համար այդ երկրներին դուրս գալ ճգնաժամից:
Բորգեշին փոխարինելու է ԱՄՀ ռազմավարության, քաղաքականության և գնահատականի ներկայիս տնօրեն Ռեզա Մոգադամը:
Հիշեցնենք, որ ԱՄՀ Եվահանձնաժողովի և Եվրոպական կենտրոնական բանկի հետ միասին կարևոր դերակատարություն ունի եվրոգոտու ճգնաժամը հաղթահարելու գործում: Այս կազմակերպություններից է կախված ԵՄ երկրներին ցուցաբերվող ֆինանսական օգնության ծավալը: