«Լավ եմ ճանաչում Տիգրան Սարգսյանին` մինչև չկործանի, չի գնա: Չի կարելի կուսակցությանը գնալ ընտրությունների` ոչինչ չխոստանալով մարդկանց»,- այսօր նման հայտարարություն արեց ՀՀ նախկին վարչապետ Հրանտ Բագրատյանը` հավելելով, որ բյուջետային աշխատավարձը չի բարձրացվում, իսկ գները կաճեն 5.5%-ով:
«Այս բյուջեն էլ ավելի կխրախուսի արտագաղթը: Տարին կորսված կլինի: Հերթական անգամ Ադրբեջանը առաջ կգնա: Այդ կլոունադան պետք է վերջացնել»:
Հ. Բագրատյանը նշեց, որ գնաճի 3 տոկոս ցուցանիշ պետք է հաշվել, քանի որ ինտերնետի գնանկումը ժողովրդի մի մասին չի վերաբերում, մինչդեռ գներն այս տարի 14.4%-ով աճ են արձանագրել, ոչ թե 4%-ով, իսկ մյուս տարի կլինի 11% աճ:
Ըստ Հ. Բագրատյանի` նույնը վերաբերում է բյուջետային ոլորտին, որտեղ ոչ մի ավելացում չկա, իսկ սոցփաթեթը ապագա ծախս է և ապագա վճարներ:
«Հօգուտ ժողովրդի ոչ մի վերաբաշխում չի լինելու: Խոշորի վրա բոլոր ավելացումները կազմում են 2-2.5 մլրդ դրամ, իսկ ժողովրդի վրա միայն գնաճի արդյունքոմ 50 միլիարդ կլինի: Տարին խոշորների համար լինելու է բերքառատ»,- նշեց Հ.Բագրատյանը:
Նրա խոսքով` ԿԲ վերջին զեկույցում «թիրախ», «լիկվիդայնություն» բառերից այն կողմ ոչինչ չգիտեն. «Հարուստներն ավելի լավ են ապրելու, ունենալու են քիչ ավելի եկամուտ, քան գնաճը: Հարուստների տեսակարար կշիռն ավելանալու է»:
Հ. Բագրատյանը հայտարարեց, որ պատասխան չկա հարցերին` գյուղատնտեսության աճը 15% են հրապարակում, բնակչությունը 3%-ով պակասել է, մթերքների ծավալն ավելացել է, ո՞նց կարող էր մթերքների գները ավելանալ 14%-ով:
«Կոչ եմ անում աշխատանքից վտարել ԿԲ նախագահին, ֆինանսների նախարարին, ով հայտարարում է` եթե Եվրոպայում լավ լինի ու գյուղատնտեսության համար տարին լավ լինի, կկատարի բյուջեն: Սա ձեռ առնել է: Մտածում է միայն իր հետույքը ապահովագրելու մասին, որ հանկարծ իրեն աթոռից չզրկեն: Ոչ ոք չի ասում, թե ինչպես եք ապահովելու 4% աճ, եթե 150 հզ. մարդ գնա երկրից: Այսօր ամբողջ իշխող վերնախավն ընկել է հանքերի վրա, գնալու են ավելի շատ հանքեր շահագործեն ու ասեն, որ ՀՆԱ աճ կա»:
