«Առաջին լրատվական»-ի զրուցակիցն է ՀՀՇ վարչության անդամ, ՀՀ Ազգային ժողովի արտաքին հարաբերությունների հանձնաժողովի նախկին ղեկավար Հովհաննես Իգիթյանը:
– Պարոն Իգիթյան, ինչպե՞ս եք գնահատում Հայաստանի ներքաղաքական իրավիճակը և մասնավորապես իշխանական համակարգի վերջին խմորումները:
– Ինձ թվում է, իշխանությունը խուճապի մեջ է, դա պարզ երևում է, որովհետև ապագա ընտրությունները նորից կապվում են կեղծիքների և այն տեխնոլոգիաների հետ, որոնք իշխանությունը արդեն օգտագործել է նախկինում: Իշխանությունը նույն մարդկանցով, նույն «օրենքներով» գնում է ընտրությունների:
– Ի՞նչ նկատի ունեք, երբ ասում եք` իշխանությունները խուճապի մեջ են: Տեսակետ կա, որ Սերժ Սարգսյանի վերջին քայլերը` պաշտոնանկությունները, ուղղված էին թիկունքն ամրացնելուն:
– Բոլորի համար՝ և՛ Հայաստանում, և՛ միջազգային կազմակերպություններում, պարզ է, թե ինչ խայտառակ ձևով են անցկացվել 2008թ. նախագահական ընտրությունները, և եթե «Հանրապետական» կուսակցությունը, իշխանությունը, համոզված են, որ դրանք, ինչպես իրենք են ասում` հասարակության վստահությունն էին վայելում` ինչո՞ւ են այսօր անում նույն քայլերը, ինչ նախորդ ընտրություններին` սկսած շտաբի պետի նշանակումից, որը փաստորեն նույնը պետք է լինի, վերջացրած բոլոր այն պաշտոնյաները, որոնք պետք է նաև պետական աջակցություն ապահովեն բոլոր կեղծիքների ու խախտումների համար: Ցանկացած պաշտոնյայի փոփոխություն եթե դիտարկենք այս տեսանկյունից, ապա ամեն ինչ տեղավորվում է հենց այդ տրամաբանության մեջ: Միայն խուճապի մեջ գտնվող մարդն է փորձում նույն սխալները կրկնել, որոնք արվել են երեք տարի առաջ:
– Պարոն Իգիթյան, իսկ քաղաքական ի՞նչ վերադասավորումներ կարող են լինել հայաստանյան քաղաքական դաշտում ընտրությունների նախաշեմին` թե՛ իշխանական, թե՛ ընդդիմադիր դաշտում: Օրինակ` վերջին շրջանում շատ էր քննարկվում ՀԱԿ-ԲՀԿ հնարավոր համագործակցությունը:
– Ես որևէ կուսակցության անուն առանձնահատուկ չէի շեշտի: Ես այսպիսի սցենար եմ պատկերացնում. «Հանրապետական» կուսակցությունը փորձելու է միայնակ` կեղծիքների, ֆինանսական ռեսուրսների, պետական ռեսուրսների միջոցով պառլամենտում բացարձակ մեծամասնություն ունենալ: Այսինքն` եթե նրանք կարողանան «ապահովել» հարյուր տոկոս ներկայություն պառլամենտում` նրանք կդիմեն այդ լկտիությանը: Այստեղ ամեն ինչ կախված է նրանից, թե այս կամ այն կուսակցությունը, թեկուզ ԲՀԿ-ն, կամ որևէ այլ կուսակցություն, որոնք կամ պրոիշխանական, կամ իրենց ընդդիմադիր են համարում, ինչպե՞ս են արձագանքելու այդ լկտիություններին: Որովհետև, ի վերջո, 2007թ. պառլամենտական ընտրությունների ժամանակ «Հանրապետական» կուսակցությունը եթե կիսվում էր, այսպես ասած, գործընկերների հետ, ապա այսօր արդեն իրենց հայտարարություններից պարզ է, որ նրանք գնալու են ամենալայնածավալ կեղծիքների, որ մեծամասնություն կազմեն:
– Ի՞նչ պետք է անել, որ իշխանությունը դարձյալ չկրկնի նույն սցենարը:
– Կտեսնենք, թե ինչպես են արձագանքում կուսակցությունները: Այսինքն` եթե կուսակցությունները չհաշտվեն այդ իրավիճակի հետ և ըմբոստանան, այդ դեպքում կլինեն այն միավորումները, ինչի մասին հարցրիք: Ես ոչ հոռետես եմ, ոչ լավատես, ես գնահատում եմ այն քայլերը, որոնք անում է իշխանությունը` ի դեմս «Հանրապետական» կուսակցության:
– Պարոն Իգիթյան, արտահերթ ընտրություններ հավանակա՞ն են, թե՞ ամեն ինչ տանում է հերթական ընտրությունների, և Ձեր նշած` իշխանության սցենարը ավելի հավանական չէ՞, որ կիրառվի հենց հերթական ընտրություններում, ինչը քիչ հավանական էր արտահերթի պարագայում:
– Ինձ համար երբեք առաջնահերթ չի եղել՝ ընտրությունները արտահե՞րթ կլինեն, թե՞ հերթական: Ինձ համար կարևոր է երկու չափանիշ` նախ չանցկացվեն նույն սցենարով ընտրություններ, դա ավելի կարևոր է, քան արտահերթ ընտրությունների պայմանը, որովհետև, եթե նույնիսկ անցկացվեն արտահերթ ընտրություններ` նույն ձևով, ինչպես իշխանությունն անցկացրել է 2007-2008թթ., ապա, անկեղծ ասած, ամբողջ պայքարը տանել նրա համար, որ ընտրությունները լինեն մեկ ամիս կամ մեկ տարի շուտ` անիմաստ է: Հաջորդը` կարևորը հեղափոխական ընտրություններ անցկացնելն է, այսինքն` ընտրություններ, որոնք փոխելու են իրավիճակը: Այն, ինչ մարդիկ սպասում էին արտահերթ ընտրություններից, նրանք գոհ կլինեն, եթե հերթական ընտրություններով հաջողվի: Դրանք կարող են համարվել հաջողված ընտրություններ Հայաստանի համար:
