Թբիլիսյան «Ախալի թաոբա» («Նոր սերունդ») թերթը, վկայակոչելով իր գաղտնի աղբյուրին, հայտնում է, որ Վրաստանի նախագահ Միխեիլ Սաակաշվիլիի շրջապատում, անկասկած, քննարկվում է արտահերթ նախագահական ընտրությունների անցկացման հարցը, որն իրականում պետք է տեղի ունենա 2013 թվականին։
Վրացական թերթի աղբյուրը պնդում է, որ Վրաստանում նախագահական արտահերթ ընտրությունները կարող են անցկացվել 2012 թվականի գարնանը։ Իշխանական ազդեցիկ ֆիգուրները, այդ թվում՝ նաև Ազգային անվտանգության խորհրդի քարտուղար Գեորգի Բոկերիան Սաակաշվիլիին խորհուրդ են տալիս ժամանակին ընդհանրապես լքել քաղաքական բեմը։
Աղբյուրի խոսքերով՝ Սաակաշվիլիի շրջապատը կարծում է, որ եթե Սաակաշվիլին զբաղեցնի վարչապետի կամ խորհրդարանի խոսնակի պաշտոնը, երկիրը չի կարող խուսափել նոր հեղափոխությունից։ Նրա տվյալներով՝ նախագահը սկզբնական շրջանում հրաժարվել է այդպես վարվելուց, սակայն ներկայումս այդ որոշումն ընդունված է։
Աղբյուրը կարծում է, որ Սաակաշվիլիի վաղաժամ հրաժարականը պայմանավորված է Ռուսաստանի նախագահի պաշտոնում ներկայիս վարչապետ Վլադիմիր Պուտինի վերադարձով։ Թերթը գրում է, որ Ռուսաստանն ու ԱՄՆ-ը համաձայնության են եկել, որ եթե Սաակաշվիլին ներկայումս հեռանա, ապա նա պատասխանատվություն չի կրի իր գործածի համար և կշարունակի խաղաղ ապրել։
Աղբյուրը վստահենցում է, որ ԱՄՆ-ը երկար է մտածել, թե ով կարող է Վրաստանի նախագահի պաշտոնում փոխարինել Սաակաշվիլիին, և այդ գործընթացում կատալիզատորի դերում ծառայեց վրացի ընդդիմադիր միլիարդատեր Բիձինա Իվանիշվիլիի՝ քաղաքական արենայում հայտնվելը։
Սաակաշվիլիի վարչակազմը դեռևս չի մեկնաբանել այս ամենը։
Հիշեցնենք, որ ավելի վաղ Սաակաշվիլին հայտարարել էր, թե իր նախագահական ժամկետի սպառումից հետո չի դառնալու վարչապետ, քանի որ նախագահ եղած մարդու համար հետաքրքիր չէ խորհրդարանից մեծ կախվածություն ունեցող վարչապետի պաշտոնը։ Մեկ այլ դեպքում էլ Սաակաշվիլին հայտարարել էր, որ տարբեր պատճառներով չի կարող Պուտին դառնալ։