Ռուսաստանը 2013 թ. կսկսի Թուրքիայում առաջին ատոմակայանի կառուցումը, որը կարժենա 20 մլրդ դոլար: Այս մասին հայտարարել է Անկարայում ՌԴ դեսպան Վլադիմիր Իվանովսկին,- փոխանցում է Balcans.com կայքը: Ատոմակայանի առաջին ռեակտորը կկառուցվի մինչև 2018 թ., իսկ մնացած երեքը շահագործման կհանձնվեն հետագա երեք տարիների ընթացքում` ամեն տարի մեկ ռեակտոր հաշվարկով: Նախատեսվում է, որ 2021 թ. վերջնական շահագործման հանձնելուց հետո ատոմակայանը կծառայի մոտ 60 տարի:
«Ակկույու ատոմակայանի՝ Ռուսաստանի կողմից կառուցումը ռուս-թուրքական համագործակցության ռազմավարական ոլորտներից մեկն է»,- հայտարարել դիվանագետը:
Հիշեցնենք, որ ատոմակայանի կառուցման պայմանագիրը ստորագրվել էր 2010 թ. մայիսին, երբ Ռուսաստանի նախագահ Դմիտրի Մեդվեդևը պաշտոնական այցով գտնվում էր Թուրքիայում: Այն կկառուցվի ռուսական Ատոմստրոյէքսպորտ կազմակերպության կողմից: Սկզբնական շրջանում այն ամբողջովին կկառավարվի ռուսների կողմից: