ԱՄՆ-ը անընդունելի է համարում Ռուսաստանին իրավական երաշխիքներ տրամադրել առ այն, որ ԵվրոՀՀՊ-ն ուղղված չէ իր դեմ, քանի որ խնդիրը «վերաբերում է ՆԱՏՕ-ի անդամ երկրներին»: Այս մասին, ինչպես հաղորդում է Коммерсантъ թերթը, հայտարարել է ԱՄՆ պետքարտուղարի քաղաքական հարցերով տեղակալ Վենդի Շերմանը:
«Ես պարզապես կարծում եմ, որ ստեղծված իրավիճակում դա սխալ քայլ կլիներ: Խոսքը ՆԱՏՕ-ի պաշտպանության մասին է և վերաբերում է ՆԱՏՕ-ի անդամ երկրներին»,- հայտարարել է նա: Շերմանի խոսքերով` փոխարենը ԱՄՆ-ը պատրաստ է տալ քաղաքական երաշխիքներ:
«Ես իրադրությունն այնպես եմ հասկանում, որ և՛ ռուսական, և՛ ամերիկյան կողմերը ցանկանում են շարունակել երկխոսությունը: Նման բանակցություններում միշտ լինում են դժվար պահեր: Այժմ մենք գտնվում ենք հենց այդ դժվար կետում: Բայց քանի որ դա կարևոր է երկու կողմերի համար, ես համոզված եմ, որ մենք ելք կգտնենք իրավիճակից: Մեզանից ժամանակ և ճարպկություն կպահանջվի, բայց մենք կշարունակենք այդ ուղղությամբ աշխատանքը»,- ասել է Շերմանը:
Պետքարտուղարի տեղակալը նշել է, որ ԱՄՆ-ը «ուրախ կլինի տեսնել Ռուսաստանի ներկայացուցիչներին, և որ նրանք կարող են գալ ու հետևել ՀՀՊ փորձարկումներին` բերելով ցանկացած սարքավորում»:
Ռուսաստանը և ՆԱՏՕ-ն 2010 թ. նոյեմբերին Լիսաբոնում տեղի ունեցած գագաթնաժողովում համաձայնության են եկել համագործակցել ԵվրոՀՀՊ նախագծի շուրջը: Չնայած դրան` բանակցությունները փակուղի են մտել, քանի որ ԱՄՆ-ը հրաժարվում է իրավական երաշխիքներ տրամադրել առ այն, որ այն ուղղված չի լինի Ռուսաստանի դեմ:
