Грузия Online-ի փոխանցմամբ՝ վրացի ընդդիմադիր միլիարդատեր Բիձինա Իվանիշվիլին հանդիպում է ունեցել Վրաց պատրիարք Իլյա 2-րդի հետ, որից հետո կողմերը լրագրողների համար կարճատև հայտարարություններ են արել։
Իլյա 2-րդը հայտարարել է. «Մենք ուրախ ենք, որ այսօր Պատրիարքարան է եկել պարոն Բիձինա Իվանիշվիլին։ Մենք զրուցել ենք շատ հարցերի և մասնավորապես Վրաստանի ապագայի շուրջ, ինչպես նաև ներկայիս Վրաստանի շուրջ։ Ես կարծում եմ, որ ամեն ինչ լավ է լինելու»։
Իվանիշվիլին իր հերթին նշել է. «Սա իմ կյանքի հերթական երջանիկ օրերից մեկն է։ Սա շատ հետաքրքիր հանդիպում է։ Ես ստացա շատ խորհուրդներ, շատ իմաստուն խորհուրդներ, որոնց ես հաշվի կառնեմ իմ գործունեության ընթացքում»։
Հիշեցնենք, որ նոյեմբերի 13-ին Իլյա 2-րդը Վրաստանի նախագահ Միխեիլ Սաակաշվիլիին կոչ էր արել Բիձինա Իվանիշվիլիին վերադարձնել Վրաստանի քաղաքացիությունը՝ ընդգծելով, որ նա ծնվել է Վրաստանում, հետևաբար պետք է ունենա Վրաստանի քաղաքացիություն։
