ԱԺ նախագահ Հովիկ Աբրահամյանը չէր հասցրել հնչեցնել «Սնանկության մասին» օրենքի անունը, երբ «Ժառանգություն» խմբակցության քարտուղար Լարիսա Ալավերդյանը նոր՝ երրորդ ընդմիջումը խնդրեց: ԱԺ փոխնախագահ Սամվել Նիկոյանը հայտարարեց, որ սա վիրավորական մոտեցում է ԱԺ-ի ու նրա աշխատանքների հանդեպ, և որևէ կապ չունի կառուցողական դիրքորոշման հետ: Ըստ Նիկոյանի` ընդմիջում պետք է վերցնել նախագիծը քննարկելու համար, ոչ թե ԱԺ աշխատանքները տապալելու:
Ստեփան Սաֆարյանը հայտարարեց, որ «Ժառանգությունը» աշխատանքային տրամադրություն ունի, և 5 օրենքների վերաբերյալ, որոնք շուտասելուկի նման քննարկվեցին, իրենք առաջարկներ են ներկայացրել:ԱԺ նախագահ Հովիկ Աբրահամյանն էլ իր զայրույթը հայտնեց այս ամենի կապակցությամբ` ասելով, որ չի կարելի աշխատանքները տապալել: «Ժառանգության» գործելաոճից դժգոհեցին նաև ՀՀԿ-ականներ Համլետ Հարությունյանն ու Վարդան Այվազյանը: Համլետ Հարությունյանը հիշեցրեց, որ որևէ մեկին չի հաջողվել տապալել ԱԺ աշխատանքները:
Երբ «Ժառանգությունը» հերթական ընդմիջումն էր խնդրում, Հովիկ Աբրահամյանը զայրացավ, որ եթե ինքը չի հնչեցրել նախագծի անունը, ապա չի կարելի ընդմիջում վերցնել։
Հովիկ Աբրահամյանը հնչեցրեց նախագծի անունը և այն դրեց քվեարկության` այդպես էլ «Ժառանգությանը» չտալով 20 րոպեանոց ընդմիջում:
Քվեարկությունից հետո արդեն պարոն Աբրահամյանը հայտարարեց 20-րոպեանոց ընդմիջման մասին: