Կոտայքի մարզպետ Կովալենկո Շահգալդյանը հերքում է մամուլում տարածված տեղեկությունները, թե պատրաստվում է հրաժարական ներկայացնել: Այս մասին նա ասաց «Առաջին լրատվական»-ի հետ զրույցում:
«Բայց ինչու պետք է հրաժարական տամ: Կարող է` այդ մասին հրապարակողները մի բան գիտեն, ես այդ մասին ոչինչ չգիտեմ: Ինչ պատճառով պիտի հրաժարական ներկայացնեմ, նույնիսկ զարմանալի հարց է: Չկա նման բան, ես շարունակում եմ պաշտոնավարել»,- ասաց Շահգալդյանը:
Կոտայքի մարզպետի համոզմամբ` կան մարդիկ, ովքեր պարբերաբար անդրադառնում են այդ հարցին: «Աստված իրենց հետ, ես շարունակում եմ պաշտոնավարել և պաշտոնից չեմ հրաժարվելու»,- նշեց նա:
Նշենք, որ «Ժողովուրդ» թերթը գրում է, թե` իր տեղեկությունների համաձայն` երեկ «Օջախ» ռեստորանում Կոտայքի մարզպետ Կովալենկո Շահգալդյանը նշել է իր ծննդյան 65-ամյակը:
«Հետաքրքիրն այն է, որ մարդիկ իրենց հարսանեկան արարողություններն են նշում տվյալ ռեստորանում, իսկ մարզպետը` ծննդյան տոնը: Ըստ ականատեսների` մարզպետի ծնունդն առաջվա պես ներկայանալի չի եղել: Պատճառն այն է, որ մարզպետի պաշտոնում Շահգալդյանը վերջին տարին է նշում ծննդյան տոնը: Նրան, ըստ լուրերի, պաշտոնանկ են անելու»,- գրում է թերթը:
