Եկամտահարկի մասին օրենքում փոփոխությունների մասին օրինագիծը կարևորագույն նշանակություն ունի՝ առնվազն փիլիսոփայության առումով, որովհետև կառավարությունը առնվազն ընկալել է պրոգրեսիվության փիլիսոփայությունը: Այսօր Ազգային ժողովում օրենքի նախագծի քննարկման ժամանակ նման հայտարարություն արեց «Ժառանգություն» խմբակցության պատգամավոր Լարիսա Ալավերդյանը:
Նա, սակայն, նկատեց, որ ոչ մի սոցիալական պատկերով հիմնավորված չէ, թե պրոգրեսիվության սկզբունքը ինչու պիտի կիրառվի 80 հազար դրամ աշխատավարձից սկսած: Ըստ նրա՝ նվազագույն շեմը պետք է լինի 2 նվազագույն աշխատավարձը: «Այդ 80 հազարը արհեստածին է»,- հայտարարեց Լ. Ալավերդյանը՝ հավելելով, որ եթե 80 հազար դրամից 20% հանում ես, մնում է 60 հազար դրամ, իսկ 2 մլն-ի դեպքում մնում է բավարար գումար ֆիզիկական վերարտադրությունը ապահովելու համար. «Պետք է սանդղակը վերանայել»:
ՀՀ ֆինանսների փոխնախարար Սուրեն Կարայանը հակադարձեց պատգամավորին, թե կառավարությունը նոր չի առաջարկում և գործող համակարգի մեջ նույնպես կա պրոգրեսիվ հարկման սկզբունքը: Միաժամանակ, նա հավաստեց, թե միջին խավի հարկային բեռը չի ավելացվում, իսկ 2 մլն դրամից ավելիի դեպքում բեռն ընդհանուր 10%-ով է ավելացվում:
