Ռուսաստանի արտաքին գործերի նախարար Սերգեյ Լավրովը քննադատել է միջազգային հանրությանը Իրանի և Սիրիայի նկատմամբ ունեցած դիրքորոշման համար` կոչ անելով ՄԱԳԱՏԷ-ին տալ այն երկրների անունները, որոնք զեկույցի համար տեղեկություններ են տարածել Իրանի միջուկային ծրագրի մասին: Լավրովը ճիշտ չի համարել նաև Արաբական երկրների Լիգային Սիրիայի անդամակցության սառեցումը:
«ՄԱԳԱՏԷ-ի գլխավոր տնօրենի վերջին զեկույցը ոչ մի նորություն չի պարունակում: Այն ևս մեկ անգամ հաստատում է, որ «ենթադրվող ռազմական հետազոտություն» անվանվող որոշ թեմաներով Իրանը մինչ այս չի տվել անհրաժեշտ պարզաբանումներ: Այնտեղ կան Իրանի վերաբերյալ մի քանի փաստաթղթեր, որոնք եկել են ուրիշ երկրից: Մենք կոչ ենք անում ՄԱԳԱՏԷ-ին այդ երկրի անունը տալ` այս հարցը պարզաբանելու համար»,- Լավրովին մեջբերում է РИА «Новости»:
Նա նաև «սպառված» է անվանել Իրանի դեմ պատժամիջոցները և կոչ է արել խնդիրը լուծել դիվանագիտական ճանապարհով:
Այն ժամանակ , երբ Ռուսաստանի արտաքին գործերի նախարարութունը հանդես է գալիս Իրանի աջակցությամբ, Մեծ Բրիտանիան, Գերմանիան, Ֆրանսիան և ԵՄ այլ երկրներ կողմ են արտահայտվել Իրանի դեմ նոր պատժամիջոցների կիրառմանը: Բացի այդ, Ֆրանսիայի արտաքին գործերի նախարար Ալեն Ժյուպենը կոչ է արել ՄԱԿ ԱԽ նիստ հրավիրել` քննարկելու համար Իրանի միջուկային ծրագիրը, և «կոշտ պատժամիջոցներ» կիառել: Հայտնի է նաև, որ ՄԱԳԱՏԷ-ի զեկույցից հետո ԱՄՆ ևս պատժամիջոցներ է նախապատրաստում Իրանի դեմ:
ՄԱԳԱՏԷ-ի զեկույցից հետո ԶՄԼ-ներում շրջանառվում էին Իրանի վրա Իսրայելի հնարավոր հարձակումների մասին լուրեր: Կիրակի Իսրայելի վարչապետ Բենիամին Նեթանյահուն հայտարարել է, որ իրանական միջուկային ծրագիրը ՄԱԳԱՏԷ-ի զեկույցում ամբողջությամբ ներկայացված չէ, և Իրանը առավել քան մոտ է ատոմային ռումբի ստեղծմանը:
Լավրովը լրագորղների հետ հանդիպման ժամանակ նաև հայտարարել է, որ արևմտյան երկրները հրահրում են Սիրիայի ընդդիմությանը` կոչ անելով տապալել Բաշար Ալ-Ասադի վարչակարգը` անօրինանկան ճանապարհով երկրի ներմուծելով զենք: Հիշեցնենք, որ Սիրիայի իշխանությունները կիրակի հայտարարել են, որ ցանկանում են հրավիրել Արաբական երկրների լիգայի արտակարգ գագաթնաժողով` քննարկելու երկրի իրավիճակը: Սիրիայի իշխանություններն այս մասին հայտնել են այն բանից հետո, երբ Արաբական երկրների լիգան որոշեց Սիրիային հեռացնել կազմակերպությունից:
Հայտնի է դարձել, որ Ռուսաստանը չի դադարեցնելու Սիրիային զենք մատակարարելը, որը ամրագրված է պայմանագրով, և այդ կապակցուաթյամբ սահմանափակումներ չկան:
