Պետական գնումների համակարգը էլեկտրոնայնացնելու արդյունքում կոռուպցիոն ռիսկերը գրեթե վերացվում են: Նման հավաստիացում այսօր ասուլիսում արեց ՀՀ ֆինանսների նախարար Վաչե Գաբրիելյանը` պարզաբանելով, որ այլևս հնարավոր չի լինի ներկայացված հայտերը կեղծել, փոխել և այլն:
Նախարարի խոսքով՝ գնումների մրցույթները էլեկտրոնային եղանակով իրականացնելն ազգային անվտանգության առումով խնդիրներ չի առաջացնի։ Սա վերաբերում է կազմակերպման ձևին, և այսօր էլ գնումները կայքում տեղադրված ու բաց են:
«Պաշտպանության նախարարության և սպառազինությունների վերաբերյալ տեղեկատվությունը չի բացվում, և որևէ երկիր դա չի բացում»,- ասաց Վ. Գաբրիելյանը:
Նա հայտնեց, որ էլեկտրոնայնացումը կատարվել է ՀԲ վարկային միջոցներով, սակայն, նշելով, որ ֆինանսավորումը կատարվել է 2 տարի առաջ, հայտարարեց, թե գումարի չափը չի հիշում:
«Այս համակարգի ներդրումն անմիջապես շուկայի կառուցվածքում փոփոխություն չի տա, բայց երկարատև ժամանակաշրջանում չի կարող ազդեցություն չունենալ»,- նկատեց նախարարը՝ հավելելով, որ եթե նախարարությունները հրատապ խնդիր ունեն լուծելու, ապա կարող են առանց այս համակարգի դա անել, սակայն իրավունք չունեն մեկ անձից գնում իրականացնելու: ՀՀ պետական գնումների մրցույթներին կարող են մասնակցել նաև օտարերկրյա ընկերությունները:
2010 թ. պետական գնումների ծավալները կազմել են մոտ 450 մլրդ դրամ:
