ՀՀ կառավարության մամլո ծառայությունից «Առաջին լրատվական»-ին տեղեկացնում են, որ վարչապետ Տիգրան Սարգսյանի գլխավորությամբ նոյեմբերի 13-ին Սևանում տեղի է ունեցել Հայաստանի ազգային մրցունակության հիմնադրամի հոգաբարձուների խորհրդի հերթական նիստը:
Նախորդ նիստի արձանագրությունների քննարկումից և հաստատումից հետո նիստի մասնակիցներն անդրադարձել են այլ երկրների փորձի հիման վրա Հայաստանի տնտեսության զարգացմանն ուղղված հարցերի:
Վարչապետը ներկայացրել է ՀԲ-ի հետ մշակված Հայաստանի արդյունաբերության ռազմավարության մանրամասները:
Տ. Սարգսյանի խոսքով` այն իրենից ներկայացնում է արդյունաբերական քաղաքականություն՝ ուղղված արտահանման ծավալների ավելացմանը: Ռազմավարաության մեջ ներառված են արդյունաբերության 11 ճյուղեր:
Նա տեղեկացրել է, որ առաջին երեք ճյուղերի՝ կոնյակագործության, դեղագործության և ճշգրիտ սարքաշինության ոլորտներում զարգացման ծրագրերն արդեն իսկ մշակվել են և դրանք քննարկվել են ՀՀ նախագահ Սերժ Սարգսյանի գլխավորությամբ՝ մասնավոր հատվածի հետ միասին:
Տ. Սարգսյանի խոսքով՝ այս ոլորտներում առկա ռազմավարական ծրագրերը ենթադրում են արտահանման ծավալների կտրուկ ավելացում:
Ծրագրվում է մինչև 2020թ. կոնյակի արտահանման ծավալները եռապատկել, իսկ դեղերի արտահանմանը` քառապատկել:
«Մեր նպատակն է պետություն-մասնավոր համագործակցության ներքո ավելացնել մեր երկրի արդյունաբերական հզորությունները և արտահանումը:
Ռազմավարության մեջ հստակ ֆիքսվել է, թե որ մարմինն ինչ աշխատանք պետք է իրականացնի:
Սա լուրջ քայլ է, քանի որ Հայաստանի անկախության պատմության մեջ առաջին անգամ մեր երկիրն ունենալու է արդյունաբերական ռազմավարություն՝ ճյուղային գերակայություններով»,- նշել է կառավարության ղեկավարը:
