Իրանական Irib News-ի փոխանցմամբ՝ պաշտոնական Թեհրանը հայտարարել է իրանցի գիտնականների մեծ հաջողության մասին, ովքեր հետ են մղել Իրանի միջուկային օբյեկտների վրա իրականացված կիբերհարձակումը։ Խոսքը նրանց կողմից Իրանի կարևորագույն օբյեկտների համակարգչային բազայում «տրոյական ծրագրի» ներթափանցումը կանխելու մասին է։
Իրանի քաղաքացիական պաշտպանության ղեկավար, գեներալ Ջալիլին հայտարարել է, որ իրենց գիտնականներին հաջողվել է չեզոքացնել առանձնահատուկ վտանգավոր «տրոյական ծրագիրը»։
Ջալիլին ընդգծել է, որ եթե իրենք չկանխեին դա, ապա այն կարող էր երկրին շատ ավելի մեծ վնաս հասցնել, քան այն համակարգչային վիրուսը, որը մի քանի ամիս առաջ լուրջ վնաս էր պատճառել երկրի տասնյակ կարևորագույն օբյեկտների, այդ թվում՝ նաև միջուկային էներգետիկ ոլորտի օբյեկտների ծրագրային ապահովմանը։
Հիշեցնենք, որ անցած տարվա սեպտեմբերի վերջին իրանական իշխանությունները պաշտոնապես ընդունեցին, որ երկրի միջուկային օբյեկտների (այդ թվում՝ Բուշեհրի ԱԷԿ-ի ու Նաթանզում գտնվող ուրանի հարստացման գործարանի) կառավարման համակարգերի համակարգչային ծրագրերը հարձակման են ենթարկվել Stuxnet անվամբ համակարգչային վիրուսի կողմից: Ավելի ուշ հայտնի դարձավ, որ Stuxnet-ը իրանական միջուկային օբյեկտներում վնասել է մոտ 30,000 համակարգիչներ և այլ սարքավորումներ:
Վիրուսը, հայտնվելով համակարգչի կամ համակարգչային ծրագրով (software) կառավարվող որևէ սարքավորման մեջ, չի գործում («քնած» է մնում) այնքան ժամանակ, քանի դեռ չի հայտնաբերում իրեն անհրաժեշտ համապատասխան կոդը, որն էլ կառավարում է որոշակի արդյունաբերական գործընթաց (օրինակ՝ միջուկային որևէ օբյեկտի աշխատանքի կառավարում)։
Դրանից հետո Stuxnet-ը, ինքնուրույն ակտիվանալով (կամ ակտիվանալով «դրսից» ստացված հրամանի համաձայն), սկսում է գործել՝ շարքից հանելով համապատասխան համակարգերն ու միաժամանակ «դուրս» հաղորդելով տվյալ օբյեկտի վերաբերյալ անհրաժեշտ տեղեկատվությունը:
Ի դեպ, Stuxnet-ը, տարածվելուց զատ, նաև ձևափոխվում է, և հայտնաբերվելուց հետո վիրուսի երեք նոր տարբերակ է սկսում տարածվել: