Լեհաստանի մայրաքաղաք Վարշավայում ոստիկանությունը 200-ից ավելի մարդու է ձերբակալել, ովքեր անկախության օրը տոնելիս մասնակցել են զանգվածային անկարգություններին: Այս մասին հաղորդում է BBC-ն:
Ձերբակալվածների մոտ կեսը` 92 հոգի, Գերմանիայի քաղաքացիներ են: Ձերբակալվածների թվում են նաև Իսպանիայի, Հունգարիայի և Դանիայի քաղաքացիներ:
Տոնական միջոցառումների ժամանակ երիտասարդներն սկսել են շշեր և այլ առարկաներ շպրտել ոստիկանների ուղղությամբ: Արդյունքում մոտ 40 ոստիկան վնասվածք է ստացել: Վնասվել է նաև 14 ոստիկանական ավտոմեքենա:
Բախումները տեղի են ունեցել աջ և ձախ ծայրահեղականների միջև: Լեհական ԶԼՄ-ների հաղորդմամբ` բախումներին մասնակցել են գերմանացի անարխիստները, ովքեր Վարշավա էին ժամանել հանրահավաքներին մասնակցելու նպատակով:
