Այսօրվա արտահերթ նստաշրջանի օրակարգում է նաև «Աֆղանստանում միջազգային անվտանգության աջակցման ուժերի կազմում ՀՀ զինված ուժերի ստորաբաժանման մասնակցության հետ կապված՝ Հյուսիսատլանտյան դաշինքի (ՆԱՏՕ) հետ իրավական հարցերի կարգավորման վերաբերյալ» 2009 թ. հոկտեմբերի 19-ին և 20-ին նամակների փոխանակմամբ կնքված համաձայնագրի գործողության ժամկետի երկարաձգման և հայկական զորախմբի թվակազմի ավելացման վերաբերյալ համաձայնագրի վավերացումը: ԱԺ ՀՀԿ խմբակցության պատգամավոր Գագիկ Մելիքյանին հարցրինք՝ արդյոք դա չի՞ խոչընդոտի հայ-ռուսական հարաբերություններին, և ընդհանրապես, ՌԴ-ն ինչպե՞ս կընդունի այդ փաստը:
Ըստ Մելիքյանի՝ սա նորություն չէ, և եթե ՌԴ-ն խանդով վերաբերվեր, ապա նախկինում արդեն դա ցույց տված կլիներ: Գագիկ Մելիքյանի խոսքերով, ՀՀ-ն հիմա էլ Աֆղանստանում ունի ներկայացուցիչներ, բայց հիմնականում այդ մարդիկ հումանիտար ոլորտում են` վարորդներ, բժիշկներ: «Նոր չէ, որ պետք է ուղարկենք»,- ասաց Մելիքյանը: