ԱՄՆ Բերքլի քաղաքում գտնվող Կալիֆոռնիայի համալսարանի մոտ «Գրավեք Ուոլ Սթրիթը» շարժման տասնյակ մասնակիցներ ձերբակալվել են ոստիկանության հետ ընդհարման պատճառով:
Զանգվածային անկարգությունները ցրելու համար նախատեսված պահակազորը ստիպված էր ուժ կիրառել, որպեսզի թույլ չտար ցուցարարներին համալսարանի վարչական գլխավոր շենքի մուտքի մոտ վրանային ճամբար հիմնել:
Ինչպես հայտնում է ИТАР-ТАСС գործակալությունը, նոյեմբերի 10-ին տեղի ունեցած ընդհարման ժամանակ ձերբակալվել է 32 մարդ օրենքի ներկայացուցիչներին չենթարկվելու և դիմադրություն ցույց տալու համար:
Բերքլիում «օկուպանտները» հետևեցին Նյու Յորքի և ԱՄՆ այլ քաղաքների իրենց համախոհներին, որոնք բողոքում էին կրթական բարձրագույն հաստատություններում պետական հատկացումների կրճատման դեմ:
Համալսարանի ղեկավարությունը թույլ էր տվել ակտիվիստներին բողոքի ցույցեր անցկացնել համալսարանի տարածքում` արգելելով միայն վրաններ ամրացնել, սնունդ պատրաստել և գիշերել բաց երկրնքի տակ: Ցուցարարները վճռականորեն մերժել են այդ պահանջը, որին անմիջապես հետևել է ընդհարումը ոստիկանության հետ:
Նոյեմբերի 9-ին ոստիկանների հետ մեկ այլ ընդհարման ժամանակ ձերբակալվել էին վեց ուսանող և համալսարանի ֆակուլտետներից մեկի աշխատակիցը: