Ֆրանսիայի նախագահ Նիկոլա Սարկոզին «Մեծ քսանյակի» գագաթնաժողովի ժամանակ ԱՄՆ նախագահ Բարաք Օբամայի հետ զրույցի ընթացքում Հունաստանի նախկին վարչապետ Յորգիոս Պապանդրեուին անվանել է «խելագար», որը գտնվում է«ընկճախտի մեջ»:
Ինչպես հայտնում է ֆրանսիական RFI ռադիոկայանը, նույն գագաթնաժողովի ժամանակ Սարկոզին Իսրայելի վարչապետ Բենիամին Նեթանյահուին անվանել է «ստախոս»: Երկու նախագահների խոսակցությունը լսել են լրագրողները:
«Խելագար Պապանդրեուն հորինել է իր հանրաքվեն, քանի որ գտնվում է ընկճախտի մեջ: Անիմաստ է նրան ճնշել. նա արդեն հատակին է. նոկաուտ»,- մեջբերում է ռադիոկայանը Օբամայի խոսքերը` հղում կատարելով Le Parisien թերթին:
Թերթի տվյալների համաձայն՝ երկու նախագահները համաձայնել են, որ Պապանդրեուն «մեծ սխալ է գործել» հանրաքվե առաջարկելով:
Նիկոլա Սարկոզիի ներկայացուցիչը հրաժարվել է մեկնաբանել այս տեղեկությունը` պատճառաբանելով, որ համացանցում շատ անիմաստ լուրեր են պտտվում, և իրենք չեն պատրաստվում դրանք բոլորը մեկնաբանել:
Հիշեցնենք, որ երեքշաբթի Սարկոզին Օբամայի հետ զրույցի ժամանակ հայտարարել էր, որ «այլևս չի կարող տեսնել» Նեթանյահուին, քանի որ վերջինս «ստախոս է»:
Իսկ Բրյուսելում՝ հոկտեմբերի վերջին կայացած ԵՄ գագաթնաժողովի ժամանակ Սարկոզին շատ կոշտ քննադատել է Մեծ Բրիտանիայի վարչապետին` խորհուրդ տալով նրան «ձայնը կտրել»:
