Ադրբեջանական 1news.az-ին տված հարցազրույցի ժամանակ Ռուսաստանի գիտությունների ակադեմիայի համաշխարհային տնտեսության և միջազգային հարաբերությունների ինստիտուտի առաջատար մասնագետ Ալեքսանդր Կռիլովն անդրադարձել է ՄԱԿ ԱԽ-ին Ադրբեջանի ժամանակավոր անդամակցությանն ու Ղարաբաղյան հակամարտության կարգավորմանը.
«Ակնհայտ է, որ անկախության 20 տարիներին Ադրբեջանը մշակել է հավասարակշռված կուրս և կարողացել է միջազգային արենայում կառուցողական փոխհամագործակցություն ծավալել հիմնական խաղացողների հետ։ Դրա շնորհիվ էլ Ադրբեջանը կարողացավ ժամանակավորապես անդամակցել ՄԱԿ ԱԽ-ին։
Ինչ վերաբերում է նրան, թե ՄԱԿ ԱԽ ժամանակավոր անդամակցությունն ինչպես կարող է ազդել Ղարաբաղյան հակամարտության կարգավորման վրա, ապա պետք է նշել, որ դա կախված է նրանից, թե Բաքուն ինչպես է օգտագործելու նոր հնարավորությունները։
Բաքուն կարող է ՄԱԿ ԱԽ ամբիոնն օգտագործել Հայաստանի դեմ դիվանագիտական և տեղեկատվական պատերազմ վարելու համար։ Այդ պատերազմը մղվում է տարիներ ի վեր և աստիճանաբար տալիս է իր պտուղները։
Ղարաբաղյան հակամարտությունը կարող է կարգավորվել միայն խաղաղ փոխզիջումների դեպքում, որոնք պետք է գտնեն առաջին հերթին հակամարտող կողմերը։ Փոխզիջումների գնալու ճանապարհը չի կարող արագ լինել։ Հակամարտող կողմերի հասարակությունները նույնպես պետք է զերծ մնան ռազմաշունչ մտածելակերպից և պատրաստ լինեն փոխզիջումների գնալու»։