Վրաստանի հետ շփումները արտգործնախարարի մակարդակով պետք է հաճախակիացնել: «Առաջին լրատվական»-ի հետ զրույցում նման տեսակետ հայտնեց քաղաքագետ Ստեփան Գրիգորյանը`խոսելով Հայաստան-Վրաստան հարաբերությունների և ՀՀ նախագահի Վրաստան կատարելիք այցի շուրջ: Քաղաքագետը նշեց, որ Վրաստան կատարվելիք ՀՀ նախագահի այցը, որը հետաձգվեց, տարբեր պատճառներ կարող է ունենալ:
«Կարող է ինչ-որ պատճառներ կան, որ մեզ հիմա ձեռնտու է ավելի ուշ հանդիպում կազմակերպել կամ տարբեր այլ պատճառներ են լինում: Ի վերջո, Ադրբեջանը դարձավ ՄԱԿ-ի Անվտանգության խորհրդի անդամ: Շատ են խնդիրները, որոնց պատճառով կարող էր հետաձգվել հանդիպումը: Ես դրանում ոչ մի առանձնահատուկ բան չեմ տեսնում»,- մեկնաբանեց քաղաքագետը`համոզմունք հայտնելով, որ Վրաստանի հետ շփումները արտգործնախարարի մակարդակով պետք է հաճախակիացնել:
Ս. Գրիգորյանն ասաց, որ չի կարծում, թե հարաբերությունները Վրաստանի հետ այնքան վատն են, որ մերժվում են հանդիպումները: «Ինձ մոտ այդ տպավորությունը չկա: Այո՛, կան հարցեր, որոնք շուտ պետք է քննարկենք, բայց մեր հարաբերություններն այնքան վատ չեն, որ մեր նախագահը չի ցանկանում հանդիպել կամ հակառակը: Կարող են լինել խնդիրներ՝ կապված ժամանակի հարմարության հետ, կապված առանձին հարցերի հետ: Գաղտնիք չի, օրինակ, հայկական եկեղեցիների խնդիրը, որոնք լարվածություն են մտցնում մեր հարաբերությունների մեջ, այլ խնդիրներ նույնպես կան` ջավախահայության սոցիալական խնդիրները»,- նշեց քաղաքագետը`հավելելով, որ մենք ՆԱՏՕ-ի հետ լավ ենք աշխատում, բայց գործում ենք Ռուսաստանի հետ, պարզ է, որ սա բերում է ինչ-որ հարցերում տարաձայնությունների:
Ըստ նրա` միջազգային կառույցներում Հայաստանը և Վրաստանը մի շարք հարցերում տարբեր կերպ են քվեարկում: Ուստի քաղաքագետը գտնում է, որ հայկական կողմը ավելի շատ պետական մակարդակով պետք է հարցերը կարգավորի և լուծի: Անդրադառնալով Վեհափառի այցին Վրաստան` Ստեփան Գրիգորյանն ասաց, որ այն անտեղի էր: Ըստ նրա`ակնհայտ էր, որ այցը նախապատրաստված չէր, դրա համար էլ մի շարք հանգամանքներ այդքան սրվեցին: «Վեհափառի անիմաստ քայլը շատ խնդիրներ առաջացրեց»,- ամփոփեց քաղաքագետ Ստեփան Գրիգորյանը:
