Փոփ երգչուհի Լեդի Գագան Բելֆաստում տեղի ունեցած MTV Europe երաժշտական մրցանակաբաշխությանը ստացել է միանգամից 4 մրցանակ:
Ինչպես հաղորդվում է՝ երգչուհին հաղթող է ճանաչվել տարվա լավագույն կատարող, լավագույն տեսահոլովալ և լավագույն երգ (Born this Way) անվանակարգերում: Բացի այդ, նրան է բաժին հասել «Երկրպագուների լավագույն աջակցություն» մրցանակը:
«Այս երգը բացառիկ է ինձ համար: Հնարավոր է՝ սա ամենակարևոր երգն է իմ բոլոր երգերից, և ամենալավ ալբոմը: Ես ձեզ սիրում եմ, իմ փոքրիկ հրեշներ»,- դիմել է Լեդի Գագան իր երկրպագուներին:
Բեմական Lady Gaga անվանումով հայտնի ամերիկուհի Սթեֆանի Ջերմանոտտան անցյալ տարի լավագույնն էր ճանաչվել MTV Music Awards մրցանակաբաշխության ժամանակ, որտեղ ստացել էր երեք մրցանակ:
MTV Europe-ում լավագույն երգիչ է ճանաչվել կանադացի Ջասթին Բիբերը, որը նաև մրցանակ է ստացել «փոփ ոճի լավագույն կոմպոզիցիա» անվանակարգում:
Լոս Անջելեսից Thirty Seconds to Mars ռոք խումբը մրցանակ է ստացել «ալտերնատիվ ոճի լավագույն կոմպոզիցիա» անվանակարգում: Երգիչ Eminem-ը դարձել է հիփ-հոփ ոճի լավագույն երգիչ, լավագույն ռոք-խումբ է ճանաչվել Linkin Park-ը:
Բացի այդ, ժամանակակից երաժշտության մեջ մեծ ավանդի համար Global icon մրցանակը ստացել են Queen լեգենդար ռոք-խմբի անդամներ Բրայան Մեյը և Ռոջեր Թեյլորը:
Մրցանակաբաշխության ժամանակ մասնակիցները հարգել են այս տարվա հուլիսին մահացած երգչուհի Էմի Ուայնհաուսի հիշատակը:
