Մայր աթոռ սուրբ Էջմիածնում այսօր Ն.Ս.Օ.Տ.Տ. Գարեգին Բ Ամենայն հայոց կաթողիկոսի գահակալության 12-րդ տարեդարձի և ծննդյան 60-ամյակի առիթով կատարվել է Հայրապետական մաղթանք:
Հայրապետական մաղթանքին ներկա է եղել ՀՀ նախագահ Սերժ Սարգսյանը, արարողությանը մասնակցել են ԱԺ նախագահ Հովիկ Աբրահամյանը, վարչապետ Տիգրան Սարգսյանը, ԱԺ պատգամավորներ, ՀՀ կառավարության անդամներ, այս առիթով Հայաստան ժամանած թեմակալ առաջնորդներ և տարբեր թեմերի պատվիրակներ, Մայր աթոռ սուրբ Էջմիածնի բարերարներ, ՀՀ-ում հավատարմագրված օտարերկրյա առաքելությունների ներկայացուցիչներ, գիտության և մշակույթի գործիչներ և բազում հավատացյալներ:
Ուկրաինայի հայոց թեմի առաջնորդ Տ. Գրիգորիս արքեպիսկոպոս Բունիաթյանի հանդիսապետությամբ եպիսկոպոսների դասը կատարել է Հայրապետական մաղթանքի արարողությունը:
Գարեգին 2-րդին գահակալության 12-րդ տարեդարձի և ծննդյան 60-ամյակի առիթով շնորհավորել է Մայր աթոռի դիվանապետ Արշակ եպիսկոպոս Խաչատրյանը:
Հայաստանի առաքելական սուրբ եկեղեցու նվիրապետական աթոռների գահակալների անունից շնորհավորանքներ են փոխանցել աթոռների ներկայացուցիչները:
Ն.Ս.Օ.Տ.Տ. Արամ Ա Մեծի տանն Կիլիկիո կաթողիկոսի անունից Ամենայն հայոց կաթողիկոսին շնորհավորել է Տ. Սեպուհ արքեպիսկոպոս Սարգսյանը, Երուսաղեմի հայոց հատրիարք Թորգոմ արքեպիսկոպոս Մանուկյանի բարեմաղթանքները փոխանցել է Տ. Արիս արքեպիսկոպոս Շիրվանյանը, իսկ Կոստանդուպոլսի հայոց պատրիարքության անունից վեհափառին շնորհավորել է Կ.Պոլսի պատրիարքական ընդհանուր փոխանորդ Տ. Արամ արքեպիսկոպոս Աթեշյանը:
Շնորհավորական ուղերձներից հետո «Ձոն Վեհափառի» երգեցողության ներքո Ամենայն հայոց կաթողիկոսը հրավիրվել է Ս. խորան, որտեղից «Պահպանիչ՚» աղոթքով օրհնել է արարողությանը մասնակից հավատավոր ժողովրդին:
Հայրապետական մաղթանքի ավարտին Մայր Աթոռում տեղի է ունեցել ընդունելություն:
