ԱՄՆ Կենտրոնական հետախուզական վարչությունը (ԿՀՎ) ամբողջ աշխարհում հետևում է Facebook սոցիալական ցանցում և Twitter միկրոբլոգերի ծառայությունում օգտատերերի կողմից փոխանակվող տեղեկությանը: Այս մասին հաղորդում է Associated Press-ը` վկայակոչելով ԿՀՎ-ին կից գործող Open Source Center (OSC) հետախուզական կենտրոնի տնօրեն Դագ Նաքուինին:
Ինֆորմացիայի տարածմանը հետևում են «Վրիժառու գրադարանավարները» (OSC հետախուզական կենտրոնի ոչ պաշտոնական անվանումը), որոնք տեղեկություն են հավաքում «Համաշխարհային ցանցում» բաց աղբյուրների նյութերի հիման վրա, հեռուստաալիքներից և ԶԼՄ-ներից:
OSC ղեկավարի խոսքերով` կենտրոնի աշխատակիցները օրական «զտում են» մինչև 5 մլն թվիթ և սոցիալական ցանցերի հաղորդագրություններ տարբեր լեզուներով: Մասնավորապես կենտրոնի աշխատանքներն ուղղված են եղել «Ալ-Քաիդայի» առաջնորդ Ուսամա բեն Լադենի սպանությունից հետո Պակիստանից դուրս եկող տեղեկությանը, ինչպես նաև Մերձավոր Արևելքում զարգացող իրադարձություններին հետևելուն:
OSC տնօրենը նշել է, որ իրենց աշխատակիցները իմացել են Եգիպտոսում ապստամբությունների նախապատրաստման մասին, չեն իմացել միայն դրանց կոնկրետ ժամկետը:
«Կենտրոնն արդեն հաստատել է, որ սոցիալական ցանցերն այնպիսի երկրներում, ինչպիսին է Եգիպտոսը, կարող են փոխել խաղի կանոնները և սպառնալ վարչակարգին»,- հայտարարել է Դագ Նաքուինը:
Նրա խոսքերով` 2009 թ.-ից իրենք սկսել են ավելի մեծ ուշադրություն դարձնել սոցիալական ցանցերին, երբ Իրանում նախագահական ընտրություններից հետո սկսվեցին հակակառավարական հուզումներ: «Այդ ժամանակ պարսկերենը սոցիալական ցանցերում և բլոգերում երրորդ խոշոր լեզուն էր»,- նշել է նա:
Նաքուինը նշել է, որ այդ աշխատանքից բացի, իրենց կենտրոնը գրեթե ամեն օր զեկույց է ներկայացնում ԱՄՆ նախագահ Բարաք Օբամային: Օրինակ՝ 2011թ. մայիսին Բեն Լադենի չեզոքացումից հետո ԿՀՎ կենտրոնը Սպիտակ տանը ներկայացրեց Twitter-յան ինֆորմացիան, որտեղ երևում էր տեղի ունեցածի նկատմամբ մարդկանց վերաբերմունքը: