ՄԱԿ-ի Մարդկային զարգացման ինդեքսի 2011թ. հրապարակված զեկույցում Հայաստանը 187 երկրների վարկանշային աղյուսակում զբաղեցնում է 86-րդ հորիզոնականը:
2010թ. համեմատ Հայաստանը նահանջել է 10 կետով:
Զեկույցը կազմվում է մարդկային զարգացման մի շարք չափանիշների համադրմամբ, որոնց թվում են տնտեսական վիճակը, ժողովրդագրական բնութագրերը, կրթական և առողջապահական համակարգերի գնահատականը, 1 շնչին ընկնող եկամուտը:
Ուսումնասիրված երկրները դասակարգված են 4` մարդկային զարգացման շատ բարձր, բարձր, միջին և ցածր մակարդակ ունեցող երկրների խմբերի:
Հայաստանն ընդգրկված է երկրորդ` մարդկային զարգացման բարձր մակարդակ ունեցող երկրների խմբում:
ՄԱԿ-ի զարգացման ծրագրի պաշտոնական կայքեջի հաղորդմամբ` ինչպես անցած տարի, այս տարի ևս վարկանշային աղյուսակում առաջին տեղում Նորվեգիան է: Մեկ շնչին բաժին ընկնող եկամուտն այս երկրում կազմել է տարեկան 47,5 հազար դոլար, կյանքի միջին տևողությունը` 81 տարի, կրթության միջին տևողությունը կազմում է 12,6 տարի:
Նորվեգիային հաջորդում են Ավստրալիան, Նիդեռլանդները և ԱՄՆ-ն:
86-րդ տեղը զբաղեցնող Հայաստանում «Մարդկային զարգացման ինդեքս- 2011» զեկույցի համաձայն, կյանքի միջին տեւողությունը 74, 2 տարի է, մեկ շնչին ընկնող եկամուտը` 5 հազար 188 դոլար, իսկ կրթության միջին տևողությունը` 10,8 տարի:
Հայաստանի հարևան երկրներում պատկերը հետևյալն է` վարկանշային աղյուսակում 75-դ տեղը զբաղեցնող Վրաստանում կյանքի միջին տևողությունը 73,7 տարի է, մեկ շնչի եկամուտը` 4 հազար 780 դոլար, կրթության միջին տևողությունը` 12,1 տարի:
Ադրբեջանը զբաղեցնում է 91-րդ հորիզոնականը, կյանքի միջին տևողությունն այստեղ 70,7 տարի է, մեկ շնչին ընկնող եկամուտը` 8 հազար 666 դոլար, կրթության միջին տևողությունը 11,8 տարի:
Իրանը զբաղեցնում է վարկանշային աղյուսակի 88-րդ, իսկ Թուրքիան` 92-րդ հորիզոնականը:
187 երկրներից բաղկացած աղյուսակի վերջին երեք տեղերը զբաղեցնում են Բուրունդին, Նիգերը և Կոնգոյի Դեմոկրատական Հանրապետությունը համապատասխանաբար:
