«Ազատություն» ռադիոկայանի հայկական ծառայության փոխանցմամբ՝ գերմանական մամուլը խստորեն քննադատել է Թուրքիայի վարչապետ Էրդողանի պահվածքը՝ Գերմանիայի և Թուրքիայի միջև աշխատանքային միգրանտների մասին համաձայնագրի 50-ամյա հոբելյանին մասնակցելու նպատակով նրա կատարած գերմանական այցի ժամանակ։
«Թուրքիայի վարչապետ Ռեջեփ Էրդողանն իրեն անտակտ պահեց՝ Բեռլին կատարած վերջին այցի ժամանակ», – գրում են գերմանական առաջատար թերթերը՝ նկատելով, որ այս վարքագիծը շարունակելու դեպքում Էրդողանին դժվար կլինի համախոհներ գտնել Եվրոպայում։
«Թուրքիայի վարչապետն ամեն անգամ Գերմանիա է գալիս սեփական գաղութն այցելող թագավորի պես», – պնդում է գերմանական Die Welt–ը և մանրամասնում. – «Էրդողանն իրեն այնպես է պահում, ասես ինքը Գերմանիայում ապրող բոլոր 3 միլիոն թուրքերի հովանավորն է, ասես նրանք բոլորը իրեն են պատկանում»։
«Այս երկրի իշխանությունները պահանջում են, որ թուրքերը գերմաներենի քննություն հանձնեն՝ Գերմանիայում ապրող իրենց ընտանիքների հետ վերամիավորվելու համար։ Դա ոչ այլ ինչ է, քան մարդու արժանապատվության ոտնահարում», – հայտարարեց էրդողանը՝ հավելելով․ – «Գերմանիայում ապրող թուրքերը նախ պետք է թուրքերեն իմանան, հետո՝ գերմաներեն»։
«Էրդողանի ամենասիրած զբաղմունքների մեկը աջուձախ բողոքելն է, թե Գերմանիան, իբր, բավարար ջանքեր չի գործադրում Թուրքիային Եվրամիություն ընդունելու համար», – գրում է Die Welt–ը։ – «Սա նրա կողմից անտակտություն է՝ թուրք–գերմանական համաձայնագրի 50-ամյակի հանդիսությունների ֆոնին, և եթե Էրդողանն այսպես շարունակի, դժվար թե ընկերներ գտնի Եվրոպայում»։
Թեման շարունակում է Frankfurter Rundschau-ն․ – «Ռեջեփ էրդողանն օգտագործեց գերմանական իր այցը՝ մարդու իրավունքների խիզախ պաշտպանի դեր ստանձնելու համար։ Սակայն, չկարծեք, թե նա այստեղ հայտարարեց Թուրքիայում ազատորեն հանրահավաքներ անցկացնելու, կրոնական ու քաղաքական իրավունքները երաշխավորելու մասին և կամ պնդեց, թե այսուհետ ազատամիտ թուրք մտավորականները կարող են չվախենալ դատական հետապնդումներից։
Նա ընդամենը պնդեց, թե Գերմանիայի իշխանությունները ոտնահարում են թուրքերի արժանապատվությունը, երբ պահանջում են նրանցից գերմաներենի տարրական քննություն հանձնել։ Սա ակնհայտորեն ցույց է տալիս, որ էրդողանը չգիտի և չի էլ ուզում իմանալ՝ ինչ է մարդկային արժանապատվությունը»։