Աղվերանում այսօր մեկնարկեց «Հրապարակայնությունը և հաշվետվողականությունը՝ Բոլոնիայի գործընթացի կարևոր սկզբունքներ» թեմայով եռօրյա սեմինար-քննարկումը հանրապետության զանգվածային լրատվամիջոցների ներկայացուցիչների համար:
Իր ողջույնի խոսքում ՀՀ ԿԳ նախարար Արմեն Աշոտյանը ասաց, որ ԿԳ ոլորտում բոլոր փոփոխությունները անհրաժեշտ է հասարակական քննարկման արժանացնել, որը պետք է ապահովեն զանգվածային լրատվամիջոցները՝ վերլուծության, նոր գաղափարների, մոտեցումների ճիշտ փոխանցման միջոցով: Ա. Աշոտյանը նաև նշեց, որ լրագրողների պատճառով իրենց իրականացրած քայլերը ոչ միշտ են ճիշտ ընկալվում հասարակության կողմից: Նախարարը հավելեց, որ ԿԳ նախարարությունը չի դադարելու աշխատել հասարակության հետ թափանցիկ և հաշվետվողական սկզբունքներով:
Ա. Աշոտյանը անդրադարձավ նաև երեկ հրապարակված ՄԱԿ-ի զարգացման ծրագրին, ըստ որի՝ 2011-ին աշխարհում մենք զբաղեցնում ենք 86-րդ տեղը, իսկ կոնկրետ կրթության ինդեքսը 2011-ին աշխարհում 56-րդն է` շրջանցելով մի շարք եվրոպական երկրների ինդեքսին: Նրա խոսքերով` այս ցուցանիշներով տարածաշրջանում մի փոքր զիջում ենք Վրաստանին, բայց զգալի առաջաընթաց ունենք Ադրբեջանի, Թուրքիայի և Իրանի համեմատ. «Սա նշանակում է, որ մեր զարգացման վեկտորը ճիշտ է»,- ասաց նախարարը:
ԿԳՆ զարգացման ծրագրերի և մոնտիտորինգի վարչության պետ Ռոբերտ Ստեփանյանը ներկայացրեց ՀՀ կրթության զարգացման 2011-2015 թթ. պետական ծրագիրը: Ծրագրի նպատակներն են առաջին հերթին բոլոր մակարդակներում բարձրացնել կրթության մատչելիությունը և երեխաների համախառն ընդգրկվածությունը նախադպրոցական՝ 90 տոկոսի, տարրական և միջին դպրոցներում՝ 99 տոկոսի, ավագ դպրոցում 95 տոկոսի հասցնել: Ինչպես նաև տասը տոկոսով մեծացնել ընդգրկվածությունը մասնագիտական կրթական ծրագրում:
Հաջորդ նպատակը կրթության որակի բարելավումն է` այն միջազգային ընդունված չափանիշներին համապատասխանեցնելը` ապահովելով հասարակության և գործարար միջավայրի բավարավածությունը մատուցվող կրթական ծառայություններից, այդ թվում` ատեստավորել հանրակրթական դպրոցների ուսուցիչների 95 տոկոսին, TIMSS միջազգային գնահատումներով ապահովել 8 տոկոս առաջընթաց 2011 թվականի նկատմամբ, ապահովել 20 տոկոս դասախոսների և ուսանողների շարժունություն, բարելավել հանրակրթական դպրոցների ուսումնանյութական բազան, բոլոր դպրոցներն ապահովել ինտերնետ կապով և այլն:
Երրորդ նպատակն է ապահովել պետական բյուջեից կրթությանը հատկացվող միջոցների շարունակական աճ և դրանց արդյունավետ օգտագործման մեխանիզմներ, պետական բյուջեից կրթությանը տրվող միջոցների մակարդակը հասցնել մինչև ՀՆԱ-ի 4 տոկոս:
Ռ. Ստեփանյանի խոսքերով` դրսից ավելի շատ են գնահատվում մեր կրթական ձեռքբերումները, քան մենք ինքներս ենք դրանք գնահատում:
«Որպես ռազմավարական ծրագիր` մեր նպատակն էր փորձել մի փոքր կտրվել այսօվա խնդիրներից, որոնք շատ են, և նայել խնդիրներին ապագայի տեսանկյունից, ցանկալի կրթական համակարգ ձևավորելու տեսանկյունից»,- ասաց Ռ. Ստեփանյանը:
