Ռուսական Regnum լրատվական գործակալության փոխանցմամբ՝ Jones Lang LaSalle միջազգային քոնսալթինգային ընկերությունն իր զեկույցում նշել է, որ 2011-2015 թվականներին Թուրքիայի տնտեսությունը շարունակելու է պահպանել եվրոպական երկրների թվում իր առաջատար դիրքը՝ հանդիսանալով ամենաարագ զարգացող տնտեսությունը։
Չնայած Թուրքիայի տնտեսական վերջին ցուցանիշները վկայում են նրա տնտեսության աճի տեմպերի դանդաղեցման մասին, այդ երկրի ՀՆԱ-ն (համախառը ներքին արդյունք) առաջիկա 4 տարիներին ավելի արագ է աճելու, քան ցանկացած եվրոպական երկրի ՀՆԱ-ն։
Այս տարվա առաջին քառորդին Թուրքիայի տնտեսությունը դարձել է աշխարհի ամենաարագ զարգացող տնտեսությունը՝ արձանագրելով 8.9 տկոսանոց աճ։ Jones Lang LaSalle-ի կանխատեսմամբ՝ Թուրքիայի տնտեսական աճը կայունանալու է և 2012 թվականի վերջին կազմելու է մոտ 5 տոկոս։
Հիշեցնենք, որ թուրքական կողմի կանխատեսմամբ՝ Թուրքիայի տնտեսությունը 2023 թվականին (Թուրքիայի Հանրապետության հիմնադրման 100-ամյակ) տեղ է գրավելու աշխարհի առաջատար տնտեսությունների լավագույն տասնյակում։
