Սա արդեն կամ շատ լուրջ է, կամ շատ անլուրջ և ծիծաղելի: Երևի թե նման հետևություն է մնում անել Հայաստանում ներիշխանական դասավորությունների երեկվա շարունակությունից:
Ինչպես հայտնի է, Միքայել Մինասյանը, ով Սերժ Սարգսյանի փեսան է, նախագահի աշխատակազմի տեղակալի պաշտոնից ազատվեց և դառնալու է ՀՀԿ նախընտրական շտաբի պետի, այսինքն Հովիկ Աբրահամյանի տեղակալը:
Երևի թե սրանով ամեն ինչ ասված է, իսկ Հովիկ Աբրահամյանի երգը իշխանական համակարգում վերջնականապես երգված: Սա նաև, ըստ երևույթին, պատասխանն է Հովիկ Աբրահամյանի այն հայտարարության, որ ընտրություններից հետո ինքը ԱԺ նախագահի պաշտոնից պակաս պաշտոն չի ստանալու:
Իրականում, Միքայել Մինասյանին նշանակելով ՀՀԿ նախընտրական շտաբում, Սերժ Սարգսյանը Հովիկ Աբրահամյանին և հանրությանը ցույց է տալիս, որ Աբրահամյանն իրականում Միքայել Մինասյանի ենթակայից բարձր պաշտոն չի ստանալու: Ֆորմալ տեսանկյունից Աբրահամյանն է Մինասյանի ղեկավարը լինելու, սակայն իրականում կարծում ենք որ բոլորի համար պարզ է, թե ինչ է նշանակում Հովիկ Աբրահամյանի պես շտաբի պետի պարագայում շտաբ տանել նաև Միքայել Մինասյանին, ով համարվում էր նախագահական աշխատակազմի կամ Սերժ Սարգսյանի անմիջական շրջապատի դե ֆակտո ղեկավարը:
Սրանով, Հովիկ Աբրահամյանը ՀՀԿ նախընտրական շտաբում, ըստ էության, վեր է ածվում անգլիական թագուհու, իսկ շտաբում բնականաբար «թագավորելու» է Մինասյանը: Աբրահամյանն արդեն հասցրել է հայտարարել, որ ուրախ է Մինասյանի նշանակման համար: Իսկ ուրիշ ի՞նչ կարող էր անել Հովիկ Աբրահամյանը, եթե ուրախ չլիներ:
Այն իրավիճակում, որում նա է հայտնվել, և այն իրավիճակում, որում ընդհանրապես հայտնվել է իշխանական համակարգը, մնում է ընդամենը ուրախանալ, թուլանալ և հաճույք ստանալ, հատկապես եթե «Արմնյուզին» հարցազրույցդ տվել վերջացրել ես:
Եվ սա վերաբերում է անկասկած ոչ միայն Հովիկ Աբրահամյանին, այլ ընդհանրապես իշխանական համակարգի բոլոր «ռահվիրաներին»: Ի վերջո, իսկապես ուրախալի է, երբ հարցազրույց ես տալիս ասենք «Արմնյուզ»-ին, ոչ թե ցուցմունք ես տալիս ինչ որ մեկ այլ տեղում: