«Առաջին լրատվական»-ի զրուցակիցն է «Նոր ժամանակներ» կուսակցության նախագահ Արամ Կարապետյանը:
– Հայաստանում հրաժարականների տեղատարափը արդյոք պայմանավորվա՞ծ է Ռուսաստանից այստեղ «ներխուժած հոսանքներով»: Հրաժարականները սկսվեցին, երբ Սերժ Սարգսյանը վերադարձավ ՌԴ-ից:
– Ճիշտ նկատեցիք, որ վերադարձից հետո կատարվեց այդ ամենը: Իմ տպավորությամբ, իշխանությունը փորձում է իր բոլոր ռեսուրսները միացնել և պատրաստվում է դիմագրավել ինչ-որ բանի: Դա հասկանալի է, հակառակ դեպքում այդ ամենն այսքան շուտ չէր սկսվի: Ինքս ընտությունների հետ կապված այս ամենից ոչ մի լավ բան չեմ սպասում, որովհետև մենք գիտեք, թե Հովիկ Աբրահամյանի՝ շտաբի պետ լինելու պայմաններում ինչպես են մյուս ընտրություններն անցել: Սրան ոչ ոք չի ուզում դեռ անդրադառնալ, բայց իմ կարծիքով` ամենակարևոր խնդիրը սա է: Ու թե՛ Ռոբերտ Քոչարյանի հարցն են լուծում, թե՛ Գագիկ Ծառուկյանի ու մնացածի: Այսինքն՝ մենք ունենք նույն մարդը շտաբի պետ, որը եղել է նախկին ընտրությունների ժամանակ: Շատ հետաքրքիր իրավիճակ է սպասվում: Այսինքն՝ նորից պետք է սպասենք, որ նրանք, ովքեր համաձայն չեն իշխանության հետ, կոտրած տաշտակի առաջ պետք է կանգնեն, ինչպես ժամանակին շանտաժի լեզվով ասաց վարչապետ Տիգրան Սարգսյանը: Ինչ վերաբերում է Ռուսաստանի գործոնին, տպավորություն ունեմ, որ ռեսուրսները այսքան արագ միացված են, այսպիսի քաոսային փոփոխությունները, որտեղ տրամաբանություն չի երևում, արվում են, քանի որ Սերժ Սարգսյանը ինչ-որ տեղ բավականաչափ վստահ չէ, թե միջազգային բոլոր կողմերի դրական վերաբերմունքը կստանա: Սա՝ մեղմ ասած:
– Դուք նշեցիք, որ դիմագրավման են պատրաստվում: Դիմագրավման՝ իշխանության ներսո՞ւմ, թե՞ ընդդիմադիր ճակատում: Ընդդիմությունից իշխանությունները հիմա կարծես այնքան էլ չեն վախենում:
– Իմ տեսակետից դա սխալ անալիզ է: Հայաստանում իրավիճակը դառնում է այնպիսին, որ յուրաքանչյուր խնդիր կարող է դառնալ շատ լուրջ հակաիշխանական շարժման հիմք: Եթե եղած գործընթացներին գումարվի սոցիալ-տնտեսական ծանր կացությունը, իսկ մեզ մոտ ստեղծված իրավիճակը լավ չէ, ապա… Եթե չեմ սխալվում՝ 5,3 տոկոսի գնաճ ունենք հիմա, ինչը ավելի է, քան նախատեսել էր կառավարությունը: Աշխարհում ճգնաժամի 2-րդ ալիքն է ծավալվում, և այս ամենը թույլ է տալիս ենթադրել, որ մենք կարող ենք ունենալ այն վիճակը ձմեռվա ընթացքում կամ դրանից հետո, որը եղավ այս տարվա մարտին, երբ գնաճի արդյունքում ժողովուրդը ոտքի ելավ: Եվ սա կարող է դառնալ այդ ամենի հիմքը: Առավել ևս, պետք է ընդունենք, որ իշխանությունը հիմա մասնատված է:
– Իսկ կարելի՞ է ենթադրել, որ ռուսաստանյան հանդիպումից հետո Ռուսաստանը Սերժ Սարգսյանին քարտ-բլանշ տվեց և հրաժարվեց Ռոբերտ Քոչարյանի վրա խաղադրույք անել:
– Այսինքն, ինչի՞ն քարտ-բլանշ տվեց:
– Ինչին չէ, ում. Սերժ Սարգսյանին: Այսինքն` Ռուսաստանը պաշտպանո՞ւմ է Սերժ Սարգսյանի թեկնածությունը և Ռոբերտ Քոչարյանին վերադառնալու դեպքում աջակցություն չի՞ ցուցաբերի:
– Ես չեմ էլ կարծում, որ Ռոբերտ Քոչարյանին ինչ-որ ժամանակ աջակցություն ցուցաբերվել է նրա դուրս գալուց հետո: Կարծում եմ, որ նմանատիպ բան չի եղել, և չեմ տեսնում: Աջակցությունը այդպես չեն ցուցաբերում: Աջակցությունը ցուցաբերում են փողով, համապատասխան ծրագրերը ֆինանսավորելով, պետական այցերի ժամանակ կարևորագույն փաստաթղթեր ստորագրելով, և այլն, և այլն: Բամբասանքային մասերը չեմ ցանկանում մտնել` գիշերները չդիմավորելով, բայց դրանք թողնենք, դա կարևոր չէ: Սակայն այն, ինչ մենք տեսնում ենք մեր աչքի առաջ, միանշանակ կարելի է ասել, հատկապես Ռուսաստանի մասին, որ շատ վառ երևակայություն է պետք ունենալ այդպես մտածելու համար:
– Բայց տեսեք, Ռուսաստանից Սերժ Սարգսյանի վերադարձից հետո Ռոբերտ Քոչարյանը մեկնեց Ռուսաստան: Դա հաստատեց նաև Ռոբերտ Քոչարյանի մամուլի խոսնակ Վիկտոր Սողոմոնյանը, պարզաբանելով, որ Քոչարյանը մասնակցելու է ԱՖԿ «Սիստեմա» ընկերության տնօրենների խորհրդի նիստին, որը կկայանա հոկտեմբերի 29-ին: Իսկ վերադարձից հետո մամուլը գրեց, որ Քոչարյանին չի հաջողվել հանդիպել ՌԴ վարչապետ Վլադիմիր Պուտինի հետ և սահմանափակվել է նրա մերձավոր շրջապատի հետ հանդիպումենրով:
– Այո, բայց Պուտինի և Քոչարյանի հանդիպումը չէր էլ նախատեսվում, նման բան չկար: Մենք բավականաչափ հետաքրքիր հետևել ենք պետական այցին, հանդիպումներից որոշակի ինֆորմացիայի ենք տիրապետում, և վստահ բան կարող եմ ասել, որ որևէ նման բան չի նախատեսվել, չի եղել, ոչ մի նմանատիպ գործընթաց առաջ չի շարժվել: Ռուսաստանը ապրում է նախընտրական իր կյանքով, և միայն խորհրդարանի ընտրություններից հետո կսկսեն անդրադառնալ հարակից հարցերին, այդ թվում ավելի լուրջ՝ Անդրկովկասին, Միջին Ասիային: Ասեմ, որ Ղրղզստանի ընտրություններում հաղթեց նոր մարդ, որը պրոռուսական մարդ է, և դա շատ ուրախալի է: