Ղրղզստանում կայացած նախագահական ընտրություններում հաղթանակ տարած Ալմազբեկ Ատամբաևն անընդունելի է համարել Բիշքեկի միջազգային օդանավակայանի տարածքում ռազմական օբյեկտների տեղակայման փաստը: Այս մասին, ինչպես հաղորդում է gazeta.ru-ն, նա հայտարարել է լրագրողների հետ հանդիպմանը:
Բիշքեկի Մանաս օդանավակայանում այժմ տեղակայված է միջազգային հակաահաբեկչական կոալիցիայի ուժերի ավիաբազան, որն օգտագործվում է Աֆղանստանի տարածքում իրականացվող ռազմական գործողությունների ժամանակ անհրաժեշտ մատակարարումներ ապահովելու համար: Դրա միջուկը կազմում են ԱՄՆ զինծառայողները և տեխնիկան:
«Մեր օդանավակայանը քաղաքացիական է և պետք է զբաղվի քաղաքացիական հարցերով»,- ասել է Ատամբաևը` ավելացնելով, որ մարդկանց մոտ վատ զգացողություններ են առաջանում, երբ վայրէջք կատարելով ռազմական ինքնաթիռներ են տեսնում:
Նրա խոսքերով` ղրղզական կողմը, սակայն, դեմ չէ, որ օդանավակայանում ավիաբազայի փոխարեն տեղադրվեր որևէ քաղաքացիական օբյեկտ:
«Չէի ցանկանա, որ ԱՄՆ հետ հակամարտության մեջ գտնվող որևէ երկիր երբևէ մեզ հարված հասցնի»,- մեկնաբանել է նա:
Ղրղզա-ամերիկյան պայմանավորվածության համաձայն` բազան պետք է Բիշքեկում մնա մինչև 2014 թ.-ը:
Ղրղզստանի նախկին նախագահ Կուրմանբեկ Բակիևը նույնպես բարձրացրել էր այս հարցը, սակայն երբ ամերիկացիները խոստացան ավելացնել ֆինանսական ներդրումները, հարցը փակվեց:
