ՀՅԴ կազմակերպած «Ժողովրդավարության մարտահրավերները և պետականաշինությունը Հայաստանում» մեկօրյա միջազգային խորհրդաժողովի մասնակից, «Անալիտիկոն» ամսագրի գլխավոր խմբագիր Գեղամ Բաղդասարյանից «Առաջին լրատվականը» հետաքրքրվեց, թե այդ խորհրդաժողովը որքանով տվեց իրեն հուզող հարցերի սպառիչ պատասխանը: «Ինքս նման խորհրդաժողովների շատ եմ մասնակցել և օգտակար բաներ քաղել ինձ համար: Բացառություն չէ նաև այս խորհրդաժողովը: Եղան լավ ելույթներ»,- արձագանքեց Գեղամ Բաղդասարյանը: Մեր զրուցակիցը կարծիք հայտնեց, որ նման բանավեճերը անհրաժեշտ են, և որ հասարակության տարբեր շերտեր պետք է ներգրավվեն այդ բանավեճերում: Գեղամ Բաղդասարյանը նշեց նաև, որ այսօրվա հրատապ թեման իշխանափոխությունն է, որն արդարացի պահանջ է: «Առաջին լրատվականը» Գեղամ Բաղդասարյանից հետաքրքրվեց, թե արդյոք բանակում տեղի ունեցող սպանությունները, Երևանի քաղաքապետի հետ կապված սկանդալային միջադեպը, դրան հաջորդած նրա հրաժարականը չե՞ն վկայում, որ պետական համակարգը կազմալուծված վիճակում է հայտնվել: Գեղամ Բաղդասարյանը չհամաձայնեց մեր դիտարկմանը: «Իրականում մենք ունենք երկու պետություն: Կա «պետություն» պետության մեջ, և դա իշխանությունն է: Հանրությունը, մեծամասնությունը և նրա շահերին հակառակ գործող «պետությունը» ունեն միանգամայն տարբեր շահեր և տարբեր պարտականություններ, ունեն նաև անվտանգության տարբեր համակարգեր: Հանրությունն այսօր դժվարանում է ընկալել մյուս «պետության» գործառույթներն ու գործելակերպը: Ամեն ինչ այդ «պետության» մեջ ընթանում է իր տրամաբանությամբ, իր սահմանած օրենքների համաձայն:
