Դեկտեմբերի 9-ին Հայաստանի ԱԳ նախարար Էդվարդ Նալբանդյանը, պաշտպանության նախարար Սեյրան Օհանյանը և ԱԱԽ քարտուղար Արթուր Բաղդասարյանը մասնակցեցին Հավաքական անվտանգության պայմանագրի կազմակերպության արտգործնախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների համատեղ նիստին:
Նիստի ընթացքում քննարկվեցին և հավանության արժանացան դեկտեմբերի 10-ին կայանալիք Հավաքական անվտանգության խորհրդի նիստի օրակարգն ու քննարկվելիք հարցերը, որոնք միտված են Կազմակերպությունը հակաճգնաժամային արձագանքման գործուն կանոնակարգերով ապահովելուն, հավաքական անվտանգության համակարգի միջոցների և ուժերի ձևավորման և կիրառման կատարելագործմանը, ռազմաարդյունաբերական ոլորտում համագործակցության հետագա ընդլայնմանը:
Նիստի ընթացքում քննարկվեցին ՀԱՊԿ վերջին գագաթնաժողովում ընդունված որոշումների կատարման ընթացքը, ինչպես նաև ս.թ. օգոստոսին Երևանում կայացած՝ ՀԱՊԿ անդամ պետությունների նախագահների հանդիպմանը ձեռք բերված պայմանավորվածությունների իրականացումը:
Համատեղ նիստի արդյունքում ստորագրվեց քառասունհինգ փաստաթուղթ, որոնք ներկայացվեցին Հավաքական անվտանգության խորհրդի հաստատմանը:
Նույն օրը տեղի ունեցավ Անկախ պետությունների համագործակցության մասնակից երկրների արտաքին գործերի նախարարների խորհրդի հերթական նիստը, որում Հայաստանի Հանրապետության պատվիրակությունը գլխավորում էր ԱԳ նախարար Էդվարդ Նալբանդյանը:
Նախարարների խորհուրդը աշխատանքները սկսեց նեղ ձևաչափով` պատվիրակությունների ղեկավարների և ԱՊՀ գործադիր քարտուղարի մասնակցությամբ, ապա նիստը շարունակեց պատվիրակությունների մասնակցությամբ:
Նիստի օրակարգը ներառում էր ԱՊՀ գործունեությանն առնչվող տասնչորս հարց, այդ թվում` հումանիտար բնագավառում համագործակցության խթանման, անվտանգության և պաշտպանական քաղաքականության բնագավառներում փոխգործակցության, իրավապահ մարմինների միջև համագործակցության ակտիվացման, «ՄԻՐ» միջպետական հեռուստաընկերության գործունեության, ԵԱՀԿ շրջանակներում ԱՊՀ անդամ երկրների փոխգործակցության և մի շարք այլ հարցեր:
Նիստի արդյունքում ԱՊՀ արտգործնախարարները հավանության արժանացրին դեկտեմբերի 10-ին կայանալիք ԱՊՀ գագաթնաժողովի օրակարգը և քննարկմանն առաջարկվող հարցերը: